Fransanın daxili işlər naziri Bruno Retailleau universitetlərdə hicabın qadağan olunmasını dəstəklədiyini bildirib. Nazir bu barədə qatıldığı televiziya proqramında çıxış edərkən fikirlərini bölüşüb.

Sfera.az “En Son Haber”ə istinadən xəbər verir ki, Retailleau, aparıcının “Universitetlərdə hicabın qadağan olunmasını istəyirsinizmi?” sualına “Bəli, bunu istəyirəm” cavabını verərək, ölkədə yeni bir müzakirənin əsasını qoyub.

O, hicabı “klassik İslama uyğun olmayan, öz dəyərlərini zorla qəbul etdirməyə çalışan islamçılığın simvolu” kimi qiymətləndirib və bu tendensiyanın qadınların statusunu aşağıladığını iddia edib.

Nazir, mövqeyinin islamofobik olmadığını vurğulayıb və məsələnin düzgün şəkildə izah edilməsinin vacibliyini qeyd edib: “Müsəlman vətəndaşlarımız özlərini hədəf aldığımızı düşünməsin. Mən əksinə, siyasi islamın inanc sahiblərinin inanclarını pozduğunu düşünürəm. Bu fərqi ayırd etməyimiz bizim xeyrimizə olar”.

Qeyd edək ki, Fransada hicabla bağlı qadağalar uzun müddətdir tətbiq olunur. 2004-cü ildə məktəblərdə dini simvolların istifadəsi qadağan edilib. 2010-cu ildə isə ictimai yerlərdə niqab tamamilə qadağa olunub və pozanlara 1500 avro cərimə nəzərdə tutulub.

Bundan əlavə, məktəb ekskursiyalarında iştirak edən anaların da hicab taxmasına məhdudiyyət gətirilməsi cəhdləri olub. Lakin bu qayda 2013-cü ildə Fransa Dövlət Şurasının qərarı ilə ləğv olunub.

Son olaraq, Fransa Senatı 18 fevral 2025-ci il tarixində idman yarışlarında hicabın qadağan olunmasını nəzərdə tutan qanun layihəsini qəbul edib. Layihənin qanuni qüvvəyə minməsi üçün parlamentin aşağı palatasının da təsdiqi tələb olunur.

Bu açıqlama Fransada dünyəvilik, fərdi azadlıqlar və dini simvollarla bağlı mübahisələri bir daha gündəmə gətirib.

Bəsti Rəfizadə
Sfera.az

Bu ölkənin universitetlərində hicab qadağan olunacaq