İngiltərə və Rusiya qələbəni fərqli qeyd edəcək - Ukrayna artıq yerini müəyyənləşdirib

İkinci Dünya müharibəsində Avropada qələbənin 80-ci ildönümü münasibətilə İngiltərədə genişmiqyaslı hərbi parad və anım mərasimləri keçiriləcək. 
Kral III Çarlz, kral ailəsinin üzvləri, Ukrayna Silahlı Qüvvələri, müharibə veteranları və minlərlə insanın iştirak edəcəyi tədbirlər Rusiyanın öz “Zəfər Günü”nü qeyd etdiyi günlə üst-üstə düşür.

Sfera.az xarici mediaya istinadən xəbər verir ki, Londonda bazar ertəsi başlayacaq dörd günlük mərasimlər çərçivəsində 1300-dən çox hərbçi parlament binasından Bukinhem Sarayına qədər yürüş edəcək.

Tədbirdə Uinston Çörçillin 1945-ci ildə etdiyi Avropa Zəfəri çıxışından hissələr də səsləndiriləcək.

Kral Çarlz və Kraliça Kamilla ilə yanaşı, Şahzadə Uilyam və Ketrin, Baş nazir Keir Starmer və İkinci Dünya müharibəsinin canlı şahidləri də tədbirdə iştirak edəcək. Ukrayna ordusunun paradda iştirakı, Britaniyanın Kiyevə olan dəstəyinin davam etdiyini nümayiş etdirəcək.

Tədbirlər Donald Trampın Rusiya-Ukrayna arasında sülh razılaşması üçün təzyiqlər göstərdiyi bir dövrdə baş verir. Rusiya da 9 May Zəfər Gününü hərbi parad və tədbirlərlə qeyd edəcək. Qeyd edək ki, Çin lideri Si Tszinpin də bu tədbirlərdə iştirak edəcək.

Baş nazir Keir Starmer sosial mediada çıxış edərək, “Ölkəmiz üçün ən böyük fədakarlığı etməyə hazır olanlara borcluyuq”, — deyə bildirib və veteranlar üçün 50 milyon funt sterlinqlik yeni dəstək paketini açıqlayıb.

Bəsti Rəfizadə
Sfera.az