ABŞ-nin hava nəqliyyatı ilə bağlı həyəcan - "İnsan ölümü ola bilər"

ABŞ-nin Nəqliyyat naziri Şon Daffi ölkənin hava nəqliyyatı sistemi ilə bağlı ciddi xəbərdarlıq edib. Nazir mövcud hava hərəkəti idarəetmə sistemi tamamilə yenilənməzsə, bunun insan ölümü ilə nəticələnə biləcək qəzalara səbəb olacağını deyib.

Sfera.az “NTV”yə istinadən xəbər verir ki, nazir bu fikirləri televiziya ilə yayımlanan hökumət kabineti iclasında səsləndirib. Daffi hava nəzarətçilərinin hələ də disketlər və köhnə kompüterlərdən istifadə etdiyini, sistemlərin isə mis tellər üzərində qurulduğunu qeyd edib. Onun sözlərinə görə, bu texnoloji gerilik uçuşların gecikməsi və ləğvi ilə yanaşı, ciddi təhlükəsizlik riskləri də yaradır.

 “Əgər tamamilə yeni bir sistem qurmasaq, nasazlıqlar qaçılmaz olacaq və insanlar həyatını itirəcək”, – deyə Ş.Daffi xəbərdarlıq edib.

ABŞ Prezidenti Donald Tramp da məsələ ilə bağlı açıqlama verib. O, Bayden administrasiyasının dövründə hava nəzarət qüllələrinin lazımi şəkildə yenilənmədiyini bildirib və keçmiş Nəqliyyat naziri Pit Buttigiegi məsuliyyətsizlikdə ittiham edib:

“Buttigieg dəhşətli iş gördü. Milyardlarla dollar boşa xərcləndi”.

Federal Aviasiya Administrasiyası isə illərdir hava hərəkəti idarəetmə sistemini modernləşdirmək və təhlükəsizliyi artırmaq üçün işlər aparır. Tramp administrasiyası yeni sistemin potensial ölümcül qəzalara qarşı mühüm rol oynayacağını vurğulayıb.

Bəsti Rəfizadə
Sfera.az