Aprelin 30-da Danimarkanın paytaxtı Kopenhagenin mərkəzi küçəsində avtomobil yerli çörək zavodunun yaxınlığında izdihamın üzərinə sürüb. Toqquşma nəticəsində azı 12 nəfər xəsarət alıb, onlardan üçünün vəziyyəti ağırdır.

Sfera.az bildirir ki, hadisə Danimarka paytaxtının məşhur istirahət zonası olan Kraliça Luiza körpüsündə baş verib.

Polis 75 yaşlı kişinin insanların üstünə çırpıldığını müəyyən edib. Əvvəlcə polis bunu bədbəxt hadisə kimi təqdim etsə də, sonradan ağırlaşdırıcı hallarla ehtiyatsızlıqdan sağlamlığa ağır xəsarət yetirmə faktı ilə bağlı iş açılıb.

Kopenhagen məhkəməsi həmin şəxsin mayın 14-dək 13 sutka müddətinə həbs edilməsinə qərar verib. Hakim müəyyən edib ki, sürücünün ümumi fiziki vəziyyətinə görə avtomobili təhlükəsiz idarə edə bilməyəcəyinə inanmaq üçün ciddi əsaslar var.

Həmin şəxs avtomobili idarə etdiyini və əyləc əvəzinə qaza təsadüfən basaraq idarəetməni itirdiyini etiraf edib. Onun sözlərinə görə, sərxoş olmayıb. Sürücü əsəb gərginliyi keçirdiyindən vəziyyətin öhdəsindən gələ bilməyib. O, xəstəxanaya həyat yoldaşını ziyarət etməyə getdiyini, dondurma almaq üçün dayandığını və qəzanın daha sonra baş verdiyini izah edib.

Təqsirləndirilən şəxs dərman qəbul etdiyini iddia edib. Bununla belə, onun sözlərinə görə, narkotik vasitələrlə avtomobil idarə etməklə bağlı heç bir xəbərdarlıq almayıb.

Aysel

75 yaşlı sürücü avtomobili izdihamın üzərinə sürdü: Ağır yaralılar var - FOTOLAR