Yeni Zelandiyada fövqəladə hal elan edildi - Səbəb
Yeni Zelandiyanın bir sıra bölgələrində, o cümlədən ölkənin ikinci böyük şəhəri olan Kristçörçdə güclü küləklər və fasiləsiz yağışlar səbəbindən fövqəladə hal elan olunub.
Sfera.az xarici mediaya istinadən xəbər verir ki, paytaxt Velinqtonda küləyin sürəti saatda 120 kilometrə çatıb. Nəticədə bəzi ərazilərdə su basqınları qeydə alınıb, məktəblər bağlanıb, çoxsaylı uçuşlar və bərə səfərləri ləğv edilib.
Rəsmilər hava şəraitinin yaxın günlərdə də davam edəcəyini bildirərək, vətəndaşları mümkün qədər evlərində qalmağa çağırıblar. Fövqəladə hallar xidməti xüsusilə sahil bölgələrində küləyin daha da güclənəcəyini qeyd edib.
Yeni Zelandiyanın meteoroloji xidməti güclü küləklərin ağacların aşması və elektrik enerjisi kəsintilərinə səbəb ola biləcəyi barədə xəbərdarlıq yayıb. Hazırda əraziyə yerli xilasedici qruplar cəlb olunub və vəziyyət nəzarətdə saxlanılır.
Bəsti Rəfizadə
Sfera.az
