ABŞ Prezidenti Donald Tramp Çin mallarına tətbiq etdiyi yüksək gömrük rüsumları ilə bağlı səslənən tənqidlərə ironik cavab verib.

Sfera.az “CBS News”nəşrinə istinadən xəbər verir ki, Ağ Evdə Nazirlər Kabinetinin iclası zamanı çıxış edən Tramp tariflərin ABŞ istehlakçılarına təsirini etiraf etsə də, bunun ciddi nəticələr doğurmayacağını bildirib: “Bəlkə uşaqların otuz əvəzinə iki kuklası olacaq və bəlkə də bu iki kukla normaldan bir neçə dollar baha olacaq”, – o vurğulayıb.

Tramp tətbiq edilən 145 faizlik tariflər nəticəsində Çində istehsalın azaldığını və bəzi fabriklərin bağlandığını iddia edib. Eyni zamanda ABŞ-nin əvvəlki Bayden administrasiyasını da tənqid edərək, “Bayden idarəçiliyi dövründə çoxunu ehtiyac duymadığımız şeyləri bizə sataraq trilyon dollar qazandılar”,– prezident deyib.

Aprelin 2-də Tramp “qarşılıqlı tariflər” çərçivəsində Çin də daxil olmaqla bir sıra ticarət tərəfdaşlarına əlavə gömrük rüsumları tətbiq etdiyini açıqlamışdı.

Bunun ardından Çin də cavab tədbiri olaraq ABŞ mallarına 125 faiz rüsum tətbiq edib. Vaşinqton isə Avropa İttifaqı və digər ölkələrə qoyulan əlavə tarifləri 90 gün təxirə salsa da, Çinə yönələn tədbirlər dərhal qüvvəyə minib.

Aprelin 25-də “Time” jurnalına verdiyi müsahibədə Tramp Çin prezidenti Si Cinpinlə tariflərlə bağlı danışıqlar apardığını iddia etsə də, Pekin bu məlumatı təkzib edib və Vaşinqtonu ictimaiyyəti çaşdırmaqda ittiham edib. Hazırda ABŞ-Çin ticarət münasibətləri gərgin olaraq qalır və tərəflər arasında diplomatik çıxış yolları axtarılır.

Fidan Hacızadə

Sfera.az

Trampdan ironik cavab: "Bəlkə də uşaqların kuklası azalacaq"