Rusiya Odesaya PUA-larla hücum etdi: 2 nəfər öldü

Rusiyanın Ukraynanın Odesa şəhərinə gecə saatlarında pilotsuz uçuş aparatları (PUA) ilə həyata keçirdiyi hücum nəticəsində 2 nəfər həlak ölüb, 15 nəfər yaralanıb. Ukrayna Fövqəladə Hallar Xidmətinin məlumatına görə, hücum zamanı şəhərdə çoxmərtəbəli binalar, fərdi evlər, bir supermarket, məktəb və bir sıra nəqliyyat vasitələri zərər görüb. Bir neçə ərazidə yanğın baş verib, hadisə yerində xilasetmə işləri davam etdirilir.

Sfera.az "NTV"yə istinadən xəbər verir ki, Odesa vilayətinin qubernatoru Oleq Kiper "Telegram" kanalında yazdığı açıqlamada, “Düşmənin hücumu yaşayış və sosial obyektlərə ciddi ziyan vurub. Bəzi yerlərdə yanğınlar başlayıb, yanğınsöndürmə briqadaları ərazidə işləyir”, – deyə bildirib.

Hücum nəticəsində dəmir yolu infrastrukturu da zədələnib. Ukrayna dövlət dəmir yolları şirkətinin məlumatına əsasən, dəmir yolları, bir bağlantı şəbəkəsi və üç yük vaqonu zərər görüb. Qurumdan verilən məlumata görə, hücum yük daşımalarına təsir etməyib və sərnişin qatarlarının qrafikində gecikmə yaşanmayıb. Həlak olan şəxslərdən birinin dəmir yolu işçisi olduğu təsdiqlənib.

Ukrayna Hərbi Hava Qüvvələrinin yaydığı məlumatda isə Rusiyanın gecə boyunca 5 ballistik raket və 170 PUA ilə hücum etdiyi bildirilib. Onlardan 74-ü Ukrayna hava hücumundan müdafiə qüvvələri tərəfindən vurularaq məhv edilib, 68-i isə elektron müharibə vasitələri ilə zərərsizləşdirilib. Qalan 28 PUA-nın aqibəti barədə məlumat verilməyib.

Bəsti Rəfizadə
Sfera.az