Əməliyyatda ölən xəstə 3 saat sonra dirildi - FOTO

Türkiyədə nadir tibbi əməliyyatla həyata qaytarılan xəstə gündəm olub.2 ay əvvəl qəfil ürək və bel ağrısı ilə xəstəxanaya müraciət edən Mustafa Şahin adlı pasiyent bütün aortasında cırılma (diseksiyası) aşkarlanıb. Bu vəziyyət adətən ölümcül hesab olunur, lakin xəstə nadir "fil gövdəsi" texnikası ilə həyata qaytarılıb.

Sfera.az xəbər verir ki, əməliyyat zamanı xəstənin bədənində qan dövranı tamamilə dayandırılıb. Bu müddət ərzində yalnız beynə qan getməsi təmin olunub və bədən 22 dərəcəyə qədər soyudulub. Əməliyyatın ən kritik 100 dəqiqəsində Mustafa Şahin "müvəqqəti olaraq ölü vəziyyətdə" saxlanılıb.

Prof. Dr. Erdilin sözlərinə görə, aorta diseksiyası diaqnozu çox zaman infarktla qarışdırılır və gec qoyulan diaqnoz ölümcül nəticələrə gətirib çıxara bilər. "Bu xəstələrin 25 faizi xəstəxanaya çatmadan həyatını itirir", - deyə o bildirib. Bu səbəbdən belə əlamətlərlə gələn xəstələrin vaxtında və düzgün mərkəzə yönləndirilməsi həyati əhəmiyyət daşıyır.

Əməliyyatda iştirak edən digər cərrahlar da bu hadisəni peşə tarixlərində nadir rast gəlinən bir uğur kimi qiymətləndiriblər. Op. Dr. Şahin Kapan "fil gövdəsi" texnikasını kitabdan oxusa da, ilk dəfə real həyatda tətbiq etdiyini deyib. Prof. Dr. Mehmet Özcan isə bildirib: "Normalda 30 dəqiqə qan dövranı dayanması mümkün sayılır. Bu xəstədə 100 dəqiqəlik müddət tətbiq etdik və o, heç bir nevroloji əlamət olmadan sağaldı".

7 saat davam edən əməliyyatın sonunda xəstə nevroloji və orqanik heç bir problem olmadan evə buraxılıb. 

Məqaləyə dair fotomateriallar: