İspaniyada elektrik böhranı bahalaşmaya səbəb oldu - Yeni qiymətlər

İspaniyada genişmiqyaslı elektrik kəsintisindən sonra elektrik enerjisinin topdansatış qiymətlərində rekord artım qeydə alınıb. Rəsmi elektrik bazarı operatoru OMIE-nin məlumatına əsasən, ölkədə bir megavatsaat elektrik enerjisinin qiyməti 3,03 avrodan 31,87 avroya qalxıb. Bu isə 950 faizdən çox artım deməkdir.

Yalnız 30 aprel tarixində qiymətlər 5,79 avrodan 31,87 avroya yüksəlib – bu isə bir gündə 450 faizlik bahalaşma deməkdir. Artımın əsas səbəbi kimi İspaniya, Portuqaliya və Fransa bölgələrində təxminən 24 saat davam edən elektrik kəsintisi göstərilir.

Sfera.az "Sözcü"yə istinadən xəbər verir ki, baş verən kəsinti enerji sistemində balanssızlıq yaradaraq bazarda qiymətlərin sürətlə yüksəlməsinə səbəb olub.

İspaniya hökuməti təxminən 1 milyard dollar zərərə səbəb olan sistem çökməsindən sonra qiymətlərə ciddi artıma gedib.

Mütəxəssislərin fikrincə, açıqlanan 31,87 avroluq rəqəm istehlakçıların birbaşa ödədiyi məbləği əks etdirməsə də, topdansatış qiymətlərindəki artımlar vətəndaşların aylıq ödənişlərinə ciddi şəkildə təsir edəcək. Xüsusilə gündəlik bazar qiymətlərinə bağlı tarifdən istifadə edən istehlakçılar bu artımdan daha çox zərər görəcək.
İspaniyada elektrik fakturalarının 60 faizi sabit xərclərə, 40 faizi isə topdansatış qiymətlərinə əsaslanır. Bu səbəbdən də qiymətlərdəki 450 faizlik artım, fakturaların dəyişkən hissəsinə birbaşa təsir göstərəcək və nəticədə vətəndaşlar daha yüksək ödənişlərlə üzləşəcək.

Bəsti Rəfizadə
Sfera.az