Belçikada əhali tətil edir - Həyat iflic oldu

Belçikada hökumətin büdcə xərclərini azaltmaq məqsədilə planlaşdırdığı islahatlara qarşı ölkə üzrə genişmiqyaslı birgünlük tətil keçirilib. Tətil nəticəsində hava nəqliyyatı, ictimai nəqliyyat və bir sıra dövlət xidmətləri tamamilə iflic olub.

Sfera.az "NTV"yə istinadən xəbər verir ki, xristian və sosialist həmkarlar ittifaqlarının çağırışı ilə keçirilən tətilə həm dövlət, həm də özəl sektordan on minlərlə işçi qatılıb.

Onlar hökumətin işsizlik və pensiya xərclərində ixtisar, sosial proqramların azaldılması və əmək hüquqlarına yönəlmiş digər qənaət tədbirlərinə qarşı çıxıblar.
Hava limanlarında təhlükəsizlik və baqaj xidməti işçilərinin tətilə çıxması səbəbindən gedən bütün uçuşlar ləğv olunub, yalnız gələn uçuşlara icazə verilib. Dəmiryolu və ictimai nəqliyyat sahəsində də ciddi pozuntular yaşanıb. Ölkə üzrə qatar reyslərinin əksəriyyəti ləğv olunub, Brüsseldə metro, avtobus və tramvay xətləri fəaliyyətini dayandırıb.

Eyni zamanda Anver limanında və bir sıra bələdiyyə xidmətlərində də fəaliyyət dayanıb. Poçt xidmətlərində çatdırılmalar həyata keçirilməyib.

Həmkarlar ittifaqları hökumətin sosial xərcləri azaltmaq siyasətini “işçi hüquqlarına birbaşa zərbə” kimi dəyərləndirir. Bu, cari il ərzində hökumətə qarşı keçirilən dördüncü kütləvi etiraz aksiyasıdır. Növbəti tətil aksiyalarının 27 iyun və 22 sentyabr tarixlərində keçirilməsi planlaşdırılır.

Qeyd edək ki, hökumətin yeni proqramına əsasən, işsizlik müavinətinin müddəti azaldılacaq, pensiyaya çıxma şərtləri sərtləşdiriləcək, əməkhaqlarının inflyasiyaya uyğun avtomatik artırılmasına dair sistem yenilənəcək və uzunmüddətli xəstəliklər üzrə dəstək proqramları məhdudlaşdırılacaq.

Bəsti Rəfizadə
Sfera.az