Almaniya bu şəxsləri 2500 avro cərimə edəcək
Almaniyada məişət tullantılarının düzgün təsnif edilməməsi problemi ilə mübarizə məqsədilə hökumət yeni qanun dəyişikliyini təsdiqləyib.
Sfera.az “Haber7”yə istinadən xəbər verir ki, Federal Ətraf Mühit, Təbiəti Mühafizə, Nüvə Təhlükəsizliyi və İstehlakçıların Hüquqlarının Müdafiəsi Nazirliyinin (BMUV) təşəbbüsü ilə hazırlanan və 2025-ci il mayın 1-dən qüvvəyə minəcək qanun dəyişikliyi tullantıların çeşidlənməsi prosesində ciddi nəzarət və məsuliyyət nəzərdə tutur.
Rəsmi statistikaya görə, Almaniyada adambaşına gündə orta hesabla 600 qram zibil istehsal olunur. Lakin bu tullantıların əhəmiyyətli hissəsi xüsusilə təkrar emal edilə bilən bioloji tullantılar düzgün ayrılmadığı üçün emala göndərilə bilmir. Bu isə həm ekoloji zərərlərə, həm də təkrar emal potensialının azalmasına səbəb olur.
Yeni qanuna əsasən, bioloji tullantıların düzgün çeşidlənməməsi halında vətəndaşlar 2500 avroya qədər cərimə oluna bilərlər. Bioloji tullantı qutularına atılması icazəli olan tullantılar sırasına bağ tullantıları, dibçək bitkiləri, kəsilmiş güllər, çörək və çörək məhsulları, yumurta qabıqları, ət və kolbasa qalıqları, balıq və sümük tullantıları, tərəvəz və meyvə qalıqları, həmçinin bişmiş, çiy və ya xarab olmuş qida məhsulları daxildir.
Qanun dəyişikliyi həm tullantıların təkrar emalını artırmaq, həm də ətraf mühitin qorunmasına töhfə vermək məqsədi daşıyır. Hökumət vətəndaşları tullantıların düzgün çeşidlənməsi barədə maarifləndirmək üçün geniş ictimai kampaniyaya da başlayacaq.
Almaniya bu addımı ilə Avropada ətraf mühitin mühafizəsinə dair daha sərt və konkret tədbirlər görən ölkələrdən biri kimi çıxış edir.
Fidan Hacızadə
