"Robotlar ən yaxşı cərrahları geridə qoyacaq" - İlon Mask

Cəmi beş ildən sonra robotlar tibbi əməliyyatların keyfiyyətinə görə ən yaxşı cərrahları geridə qoya biləcəklər. 

Sfera.az xəbər verir ki, bu fikri ABŞ Hökumətinin Effektivliyi Departamentinin (DOGE) kuratoru İlon Mask deyib.

"Robotlar bir neçə il ərzində yaxşı cərrahları, təxminən beş ildən sonra isə ən yaxşı cərrahları geridə qoyacaq", - o, öz “X” hesabında yazıb.

İş adamı qeyd edib ki, onun Neuralink şirkəti beyinə elektrodların implantasiyası üçün robotlardan istifadə etməyə məcbur olub, çünki insan əlləri belə əməliyyatı lazımi sürət və dəqiqliklə yerinə yetirmək iqtidarında deyil.

Qeyd edək ki, Maskın 2016-cı ildə əsası qoyulan Neuralink startapı nəhayət insan beyninə implantasiya oluna biləcək çiplər hazırlayır. Sahibkar hesab edir ki, bu cür neyron interfeyslər insana süni intellektə müqavimət göstərə bilən kiborqa çevrilməyə imkan verəcək, həm də insanlara düşüncə gücündən istifadə edərək kompüteri idarə etməyi öyrənməyə kömək edəcək. 2023-cü ildə şirkət insanlar üzərində klinik sınaqlar keçirmək üçün ABŞ Qida və Dərman İdarəsindən icazə aldığını da açıqlayıb.

Firuzə Əliyeva