Şimali Koreya Rusiyaya əsgər göndərdiyini açıqladı

Şimali Koreya hökuməti Ukraynaya qarşı döyüşmək üçün Rusiyaya əsgər göndərdiyini rəsmi olaraq təsdiqləyib. 

Sfera.az xarici mediaya istinadən xəbər verir ki, Koreya Fəhlə Partiyasının Mərkəzi Hərbi Komissiyası bildirib ki, bu addım Pxenyanda imzalanan Hərtərəfli Strateji Tərəfdaşlıq Sazişi çərçivəsində atılıb.

Rəsmi bəyanatda Şimali Koreya əsgərlərinin Rusiyanın Kursk bölgəsində “qəhrəmanlıqla döyüşdüyü” və “neonasist Ukrayna qüvvələrinin məhv edilməsinə mühüm töhfə verdiyi” vurğulanıb. Əsgərlərin Rusiya ərazisini öz torpaqları kimi müdafiə etdiyi, bu addımın Şimali Koreya-Rusiya ittifaqını gücləndirdiyi qeyd olunub.
Şimali Koreya açıqlamasında Rusiyaya verdiyi hərbi dəstəyin beynəlxalq hüquqa uyğun olduğunu da iddia edib.

Xatırladaq ki, Kim Çen In və Vladimir Putin ötən il Pxenyanda qarşılıqlı hərbi dəstəyi nəzərdə tutan strateji saziş imzalamışdılar.

Fidan Hacızadə