İran və ABŞ arasında danışıqların üçüncü raundu başladı

İran və ABŞ arasında Oman vasitəçiliyi ilə aparılan müzakirələrin üçüncü raundu Omanın paytaxtı Məskətdə start götürüb.

Sfera.az “Milliyet”ə istinadən xəbər verir ki, müzakirələrdə İran heyətinə İran xarici işlər naziri Abbas Əraqçi, ABŞ heyətinə isə ABŞ-ın Yaxın Şərq üzrə xüsusi nümayəndəsi Stiv Vitkoff rəhbərlik edir.

Məskətdə iki ölkə arasında həm texniki səviyyədə ekspert danışıqları, həm də yüksək səviyyəli diplomatik görüşlər keçiriləcək.

Qeyd edək ki, ABŞ Prezidenti Donald Tramp 2018-ci ildə ölkəsini birtərəfli qaydada İranla nüvə anlaşmasından çıxarmışdı. Bu ilin mart ayında isə Tramp İran lideri Ayətullah Əli Xameneiyə birbaşa nüvə danışıqları təklifi və bəzi təhdidlər ehtiva edən məktub göndərmişdi. İran bu məktuba Oman vasitəsilə cavab vermişdi.

Tərəflər ilk dolaylı görüşlərini 12 aprel tarixində Oman’da həyata keçirmişdi. Ardınca, 19 aprel tarixində İtaliyanın paytaxtı Romada yenidən Oman vasitəçiliyi ilə görüşən tərəflər, müzakirələrdə irəliləyiş əldə olunduğunu bəyan etmişdi.

Hazırda Məskətdə davam edən görüşlərin nəticələri diqqətlə izlənilir.

Bəsti Rəfizadə