Papa Fransisk son mənzilə yola salınır - FOTO
Katolik dünyasının dini rəhbəri Papa Fransisk bu gün Vatikanın Əziz Pyotr Meydanında təşkil olunan sadə və möhtəşəm mərasimlə son mənzilə yola salındı. Cənazə mərasimində dünyanın müxtəlif ölkələrindən gələn dövlət, hökumət başçıları, rəsmi dövlət nümayəndələri, dini liderlər, miqrantlar və məhbuslar da iştirak edirdi.
Sfera.az xarici mediaya istinadən xəbər verir ki, dəfn mərasiminə ABŞ Prezidenti Donald Tramp, Argentina, Fransa, Almaniya, İtaliya, Polşa və Ukrayna dövlət başçıları, İngiltərə və Yeni Zelandiya baş nazirləri, eləcə də Avropa kral ailələrinin üzvləri qatılıb. Məlumata görə, mərasimdə 250 min nəfərdən çox insan toplaşıb.
Papa Fransiskin cənazəsi şənbə günü səhər saatlarında St. Pyotr Bazilikasından çıxarılaraq meydana gətirilib və burada saat 11:00-da vida mərasimi keçirilib. Mərasimin ön sıralarında yer almaq istəyən yüzlərlə insan gecəni Vatikan ətrafında keçirib.
Fransisk Avropa xaricindən seçilən ilk Papa kimi tarixi bir yeniliyə imza atmışdı. Pontifikat dövründə kasıbların, hüquqları tapdanan insanların və miqrantların səsi olmuşdu. Eyni zamanda, kilsədəki cinsi istismar qalmaqalları ilə mübarizə aparmış, idarəetmədə şəffaflığı artırmağa çalışmış və boşanmış şəxslər ilə LGBT icmasını da kilsəyə yaxınlaşdırmaq üçün addımlar atmışdı.
Papa, dəfn mərasimində də sadəliyə üstünlük verdi. Ənənəvi olaraq tətbiq olunan üç tabutla dəfn qaydasını rədd edən Fransisk, sadə sinklə bərkidilmiş taxta tabutda torpağa tapşırıldı. O, həmçinin Vatikan xaricində, Roma şəhərindəki Santa Maria Mağgiore Bazilikasında dəfn edilən ilk Papa oldu. Onun məzar daşında sadəcə Latınca “Franciscus” yazılıb, üzərində isə boynunda daşıdığı sadə dəmir xaçın bir nüsxəsi yerləşdirilib.
Cənazə maşınları Roma küçələrindən keçərək xalqa vida imkanı yaratdı. Şəhərdə təhlükəsizlik tədbirləri gücləndirildi və İtaliya hava sahəsi müvəqqəti bağlandı.
Papa Fransiskin torpağa tapşırılmasının ardından, diqqətlər yeni Papa seçilməsi üçün 6 may tarixində başlayacaq Kardinallar Kollegiyasına yönəldi.
Bəsti Rəfizadə
