ABŞ Dövlət Departamentinin Yaxın Şərq İşləri Bürosunun yüksək səviyyəli nümayəndəsi Tim Lenderkinq Suriya rəhbərliyinin ABŞ-nin tətbiq etdiyi sanksiyaları yumşaltması üçün müəyyən addımlar atılmasının zəruri olduğunu bildirib. O, Dəməşq rəhbərliyindən amerikalı məhbuslar, xarici döyüşçülər və kimyəvi silahlarla bağlı konkret addımlar gözlədiklərini qeyd edib.

Sfera.az xarici mediaya istinadən xəbər verir ki, Lenderkinq, ABŞ-nin sanksiyaların yüngülləşdirilməsi üçün Suriya rəhbərliyinin dəyişikliklər etməsi halında “etimad qurulacaq bir fürsət” axtaracağını vurğulayıb.

Lakin bu məsələlərin sürətli şəkildə həll olunmasının mümkün olmadığını qeyd edib. O, həmçinin ABŞ-nin, Suriyadakı itkin düşən amerikalılarla bağlı etibarlı məlumatlar əldə etməyə çalışdığını bildirib.

Lenderkinq, İran və Hizbullahın Suriya torpaqlarında möhkəmlənməsinin qarşısını almaq üçün ABŞ-nin israrlı olduğunu və bu mövzuda təminatlar tələb etdiklərini bildirib. Eyni zamanda, İŞİD və digər terror qrupları ilə mübarizənin davam etməsi üçün Şam hökumətinin əməkdaşlığını istəyib.

Suriya rəhbərliyindən kimyəvi silahların tamamilə məhv edilməsini və qonşu ölkələrə qarşı təcavüzdən imtina etmələrini tələb edən Lenderkinq, “xarici döyüşçülərin” hökumət və təhlükəsizlik strukturlarından uzaqlaşdırılmasını da əlavə edib. O, bu sahələrdə irəliləyiş əldə olunarsa, Vaşinqtonun Suriya ilə daha geniş bir dialoqa açıq olacağını bildirib.

Lenderkinq, Suriya rəhbərliyinin irəliləyiş göstərməsi halında ABŞ-nin sanksiyaları yumşaltmağı düşünəcəyini vurğulayıb və Suriyanın ikinci bir şans əldə etməsini istədiklərini qeyd edib.

Bəsti Rəfizadə

ABŞ Suriya ilə normallaşmaya hazırdır - Şərtlər açıqlandı