“Üzərimizə fosfor yağdırırdılar, adamlar yanırdı” - Rus əsgərlərindən iddia

Rusiya-Ukrayna müharibəsi davam etdikcə tərəflər arasındakı gərginlik daha da artır. Rusiya mediası Ukrayna Silahlı Qüvvələrinin beynəlxalq hüquqla qadağan olunmuş silahlardan istifadə etdiyini iddia edib.

Sfera.az "NTV"yə istinadən xəbər verir ki, RIA Novosti xəbər agentliyi, Ukrayna ordusunun Rusiya əsgərlərinə qarşı fəal şəkildə fosfor mərmilərindən istifadə etdiyini yazıb.

Məlumata görə, bu hücumlar nəticəsində Rusiya əsgərləri arasında çoxsaylı yanıq və boğulma halları baş verib.

60-cı Motoatıcı Briqadanın əsgərlərindən biri agentliyə açıqlamasında bildirib: “Üzərimizə fosfor yağdırırdılar. Çox sayda yaralımız oldu. Adamlar boğulurdu, yanırdı, sığınacaqlar alışıb yanırdı”. Onun sözlərinə görə, bu bombardmanlar təxminən iki ay ərzində, hər gün 30-40 raket atılmaqla həyata keçirilib.

Xatırladaq ki, 2024-cü ilin dekabr ayında Rusiya Xarici İşlər Nazirliyinin sözçüsü Mariya Zaxarova da oxşar iddia ilə çıxış edərək, Ukrayna qüvvələrinin ağ fosfor sursatı istifadə etdiyinə dair Rusiyanın “inkarolunmaz sübutlara” malik olduğunu bildirmişdi. Zaxarova bu silahların Cenevrə Konvensiyası ilə qadağan olunduğunu xatırlatmışdı.

Bəsti Rəfizadə