Məşhur futbolçunun ailəsi evdən qaçırıldı: Özü çarpayının altında gizləndi

Ekvadorda futbolçu Cekson Rodrigesin ailəsi oğurlanıb.

Sfera.az xəbər verir ki, “Emelec” futbol klubunun müdafiəçisi 26 yaşlı Cekson Rodrigesin həyat yoldaşı və 5 yaşlı uşağı aprelin 23-də Ekvadorun Quayaquil şəhərindəki evindən qaçırılıb. O, kiminsə giriş qapısını sındırdığını eşidəndə polisə çarpayının altında gizləndiyini deyib.
 

Polis rəisi Edison Rodriges bildirib ki, cinayətkarlar gecə saat 3 radələrində ekvadorlu futbolçunu axtarmaq üçün evə soxulublar.
 

Cekson Rodriges hüquq-mühafizə orqanlarına verdiyi ifadəsində giriş qapısının sındırılma səslərini eşidəndə çarpayının altında gizləndiyini etiraf edib.

Polisin bildirdiyinə görə, qaçıranlar qadından futbolçunun evdə olub-olmadığını soruşub, sonra onu və uşağını aparıblar. Rodriges pəncərədən qoşa kabinli boz pikapda olan insanları görüb.
 

Jurnalistlər qeyd edirlər ki, insident Ekvadorun 9 regionunda 10 gün əvvəl elan edilmiş fövqəladə vəziyyət fonunda baş verib. Fövqəladə vəziyyət ölkədə zorakılıq dalğası yaradan mütəşəkkil cinayətkar qrupların fəaliyyətinin qarşısını almaq üçün bu ərazilərdə təhlükəsizlik qüvvələrinin səfərbər edilməsini nəzərdə tutur.


Hökumətin məlumatına görə, 2025-ci ilin yanvar-mart aylarında Ekvadorda 2345 zorakı ölüm qeydə alınıb, onlardan 742-si ölkənin paytaxtı Kitodan 270 km cənub-qərbdə yerləşən Quayakildə baş verib.

Aynil