“Kabus” və “Maddə” filmlərinin ulduzu, 62 yaşlı amerikalı aktrisa Demi Mur dünyanın ən gözəl qadını seçilib.

Brüs Uillisin keçmiş həyat yoldaşına bu adı “People” jurnalı verib.

Sfera.az bildirir ki, məşhur ulduz nəşr üçün çəkilmiş fotosessiyadan kadrları “İnstaqram”da paylaşıb.

Şəkillərdə Demi Mur uzun saçlarını toplayıb, şalvar kostyumu və zərif paltarları ilə poza verib. Fotolardan birində məşhura sahibi ilə tez-tez gəzintiyə çıxan iti Plov da qoşulub.

Demi Mur etiraf edib ki, o, indi ideala can atmaqdan daha çox sahib olduğu şeylərə dəyər verir.

"Vücudumun keçdiyi hər şeyə və məni indi hara apardığına görə daha çox qiymət verirəm. Bu o demək deyil ki, bəzən güzgüyə baxıb "Aman Tanrım, mən qocalmışam" və ya "Üzüm sallanıb" deyə düşünmürəm, əlbəttə ki, belədir. Amma bu gün başa düşürəm ki, bu, səyahətimin sadəcə bir hissəsidir. Ən əsası isə, artıq mənim kimin rolu olduğunu, ya da kimə dəyər verdiyimi müəyyən etmir."

Xüsusən də ekran ulduzu artıq pəhrizlərlə özünə işgəncə vermir, sağlam həyat tərzi keçirməyə çalışır.

"Əvvəllər özümə işgəncə verirdim. Malibudan Paramounta velosiped sürmək kimi çılğın şeylər. Görünüşümə xüsusi diqqət yetirirdim. Amma bu gün gördüyüm ən böyük fərq odur ki, yanaşmam indi sağlamlıq, uzunömürlülük və həyat keyfiyyətinə əsaslanır. Özümə qarşı daha mülayim oldum. Əvvəllər çox sərt idim - bədənimlə münasibətim demək olar ki, antaqonist idi" - deyə Demi bildirib.

Qeyd edək ki, 2024-cü ildə Kann Film Festivalında premyerası olan "Maddə" filmindəki məşhur rolundan sonra Demi Mur karyerasında ilk Qızıl Qlobusu, Ekran Aktyorları Gildiyası Mükafatını aldı. Aktrisa “Oskar” da qazana bilərdi, lakin həmin mart axşamı heykəlciyi "Anora" filminin baş aktrisası Mikey Madison aldı.

Qeyd edək ki, 2024-cü ildə dünyanın ən gözəl qadını adını aktrisa Sofiya Verqara alıb. Bir vaxtlar isə Culiya Roberts beş dəfə “People” jurnal nömrəsinin üz qabığını bəzəyib.

Aynil

Dünyanın ən gözəl qadınının adı açıqlandı - FOTOLAR