İran Prezidenti Məsud Pezeşkian ölkəsinin milli maraqları qorunduğu təqdirdə nüvə proqramı ilə bağlı ABŞ ilə razılaşmaya hazır olduğunu bildirib. O, bu mövqeyini ölkə regionlarının qubernatorları ilə görüşündə ifadə edib.

İranın milli maraqları nədir? ABŞ-nin əsas tələbləri nədir və hansı güzəştlərə gedə bilər?

Sfera.az bu barədə açıqlama verən millət vəkili Hikmət Babaoğlu ABŞ və İran arasında olan bu kəskin siyasi ritorikanın alt qatlarında yumşaq bir qarşılıqlı yanaşma olduğunu deyib.

Deputatın fikrincə, bəzən biz bunu diplomatik kanallarla həssaslaşdırılmış fikirlər vasitəsilə də eşidirik:

“Yəni bu İran münasibətləri yalnız barışmaz ciddiyyətlərdən ibarət deyil. Ona görə də şübhəsiz ki, Vaşinqton İranda məsələlərə nəzarət etmək istəyir, İranın bir sıra məsələlərində maraqlıdır. Çünki İran özlüyündə bir çox xalqların həbsxanasıdır və bu xalqlar bu həbsxanadan çıxarlarsa, yeni bir reallıq yarana bilər”.

H.Babaoğlu vurğulayıb ki, xüsusilə Azərbaycan və türk dünyası üçün yeni şanslar ortaya çıxa bilər:

“Bu səbəbdən də təkcə ABŞ deyil, kollektiv Qərb də bunu istəmir. Çünki o zaman regionda tamamilə fərqli bir türk gücü yarana bilər. Bu səbəbdən ABŞ İranın dağılması məsələsində onu müdafiə edəcək. Amma mümkün qədər daha zəif bir İran istəyir ki, ABŞ-nin yaxın müttəfiqi olan İsrailin maraqlarına təhlükə və təhdid yarada bilməsin. İranın Prezidenti Məsud Pezeşkian İranın milli maraqlarını ifadə edibsə, bu çox aydındır. Mənə elə gəlir ki, bu gün İranın milli maraqları məzhəb ideologiyasına əsaslanan mövcud reallığı qorumaqdan ibarətdir”.

Fidan Hacızadə

ABŞ və İran münasibətləri düzəlir?: "Vaşinqton İranı zəiflətmək istəyir, amma..."