İnsanlar və robotlar qaçış yarışına girdi
Çinin paytaxtı Pekinin cənub-şərqində yerləşən Yizhuang texnologiya zonasındakı bir ölkə parkında dünyanın ilk insanabənzər yarımmarafonu keçirilib.
Sfera.az “CNN” nəşrinə istinadən xəbər verir ki, yarışda 20-dən çox ikiayaqlı robot 12 min insan iştirakçı ilə eyni yolda rəqabət aparıb.
Yarış Çinin “humanoid” texnologiyasında əldə etdiyi irəliləyişləri nümayiş etdirməklə yanaşı, ABŞ kimi qabaqcıl ölkələrlə rəqabətə girə bilmək cəhdinin bir hissəsi kimi qiymətləndirilir. Finiş xəttinə qədər robotlar 21 kilometrlik dolama və enişli-yoxuşlu platfotmanı qət etməli olublar.
İnsan qaçışçılar kimi robotlar da dayanmadan irəliləmək üçün enerji ehtiyacına malik idilər. Bu səbəblə, yarış zamanı batareyalarının dəyişdirilməsinə icazə verilib. Komandalar, həmçinin texniki problemlə üzləşən robotlarını əvəz edə bilib, lakin hər dəyişiklik üçün 10 dəqiqəlik cərimə tətbiq olunub.
Yarışı qazanan komandanın rəhbəri bildirib ki, onların robotu hazırda insanabənzər texnologiya sahəsində rəqabətin güclü olduğu dövrdə Qərb modellərinə uyğunlaşdırılıb.
Son aylarda Çin istehsalı robotların velosiped sürməsi, təpik və salto vurması ilə bağlı yayılan görüntülər sosial mediada böyük marağa səbəb olub. Bu texnoloji nailiyyətlər dövlət mediası tərəfindən ölkənin iqtisadi inkişafının potensial mühərriki kimi təqdim edilir.
Çinin Sənaye və İnformasiya Texnologiyaları Nazirliyi isə 2023-cü ildə yaydığı siyasət sənədində insanabənzər robot sektorunu “texnoloji rəqabətin yeni sərhədi” adlandırıb. Nazirlik 2025-ci ilə qədər əsas komponentlərin kütləvi istehsalına və təhlükəsiz təchizat zəncirinin yaradılmasına dair hədəflər müəyyənləşdirib.
Bütün bu texnoloji yeniliklərə baxmayaraq, yarış bir həqiqəti ortaya qoydu ki, süni intellekt və robotların sürətli inkişafına baxmayaraq, insan hələ də qaçışda öndədir.
Fidan Hacızadə
