ABŞ hökuməti 2021-ci ildə "Taliban" rejimindən qaçaraq ölkəyə yerləşən əfqan qaçqınlardan 7 gün ərzində ölkəni tərk etmələrini tələb edib. Müvəqqəti qalmaq izni olan bu şəxslərin, ölkəni tərk etməyəcəyi halda deportasiya və digər hüquqi sanksiyalarla üzləşəcəkləri bildirilib.

Sfera.az "Newsweek" dərgisinin məlumatına istinadən xəbər verir ki, ABŞ ordusuna dəstək verdikləri üçün ölkəyə qəbul edilən bu şəxslər hazırda deportasiya təhlükəsi ilə qarşı-qarşıyadır.

ABŞ Daxili Təhlükəsizlik Nazirliyi, Şimali Karolina ştatının Raleigh və Durham bölgələrində yaşayan əfqan qaçqınlara rəsmi xəbərdarlığı əks etdirən e-poçtu göndərərək 7 gün müddətində ölkədən çıxmalarını tələb edib.

Qaçqınlara yardım göstərən “Refugee Hope Partners” təşkilatının nümayəndəsi Amanda Herbert bu qərarın qəfil verildiyini və ailələrə əvvəlcədən xəbərdarlıq edilmədiyini bildirib:

“Bu, ciddi sarsıntıya səbəb olub. Onsuz da travma yaşamış ailələr üçün bu proses yenidən ağır psixoloji vəziyyət yaradıb”.

Herbert, əfqanların qanuni yollarla ABŞ-yə daxil olduqlarını, vergi ödədiklərini, təhsil aldıqlarını və cəmiyyətə töhfə verdiklərini vurğulayaraq bu şəxslərin hüquqlarının müdafiə edilməli olduğunu qeyd edib. O, deportasiya qərarı ilə üzləşən şəxslərə ilk olaraq miqrasiya hüquqşünasına müraciət etməyi tövsiyə edib.

Məsələ ilə bağlı danışan əfqan qaçqınlardan biri WRAL televiziyasına açıqlamasında deyib:

“Əfqanıstana geri qayıtsaq, orada təhlükəsizliyimiz təmin olunmayacaq. Bu, sanki özümüz üçün intihar hökmü imzalamaq deməkdir”.

ABŞ Konqresinin məlumatına əsasən, 2021-ci ilin avqustundan 2024-cü ilin avqustunadək təxminən 150 min əfqan ABŞ-yə yerləşdirilib. Hazırda bu şəxslərin gələcəyi ilə bağlı qeyri-müəyyənlik davam edir.

Bəsti Rəfizadə

ABŞ əfqan qaçqınlarını qovur - Bu tarixə qədər ölkəni tərk etməlidilər