ABŞ-yə viza almaq çətinləşdi: Yeni tələblər qoyulub
ABŞ Prezidenti Donald Trampın rəhbərlik etdiyi administrasiya, viza müraciətlərinə dair mübahisəli bir qərar verib. Yeni təlimata əsasən, viza müraciəti edən şəxslərin sosial media hesabları incələnəcək və onların Qəzza ilə bağlı paylaşım edib-etmədiklərinə xüsusi diqqət yetiriləcək.
Sfera.az xarici mediaya istinadən xəbər verir ki, bu qərar, son zamanlar ABŞ-də Fələstinə dəstək verən şəxslərin həbs olunması ilə bağlı artan narahatlıqlar fonunda verilib.
Belə ki, ötən ay Tufts Universitetinin doktorantı Rümeysa Öztürk Fələstinə verdiyi dəstəyə görə saxlanılmışdı. Son olaraq, Nyu-Yorkdakı Kolumbiya Universitetində təhsil alan fələstinli bir tələbənin də ABŞ vətəndaşlığı üçün müraciət zamanı saxlanıldığı bildirilib.
Yeni qaydalar insan haqları müdafiəçiləri tərəfindən kəskin şəkildə tənqid olunub. Onlar bu qərarın söz azadlığına və şəxsi məxfiliyə ciddi təhdid yaratdığını bildirirlər.
Məsələ ilə bağlı açıqlama verən ABŞ Vətəndaşlıq və Miqrasiya Xidmətləri (USCIS) isə bildirib ki, bundan sonra xarici vətəndaşların sosial mediada antisemitik fəaliyyətləri və yəhudilərə qarşı fiziki təcavüz halları, onların göç və viza müraciətlərinin rədd edilməsi üçün əsas sayılacaq. Bu qərar daimi yaşayış icazəsinə müraciət edənlərə, xarici tələbələrə və antisemitik fəaliyyətlərlə əlaqəli təhsil müəssisələri ilə bağlılığı olanlara birbaşa təsir göstərəcək.
Yeni siyasət ABŞ-də fikir azadlığı və immiqrasiya prosesi ilə bağlı müzakirələri daha da alovlandırıb.
Bəsti Rəfizadə
