Rusiyada 80 yaşlı qadın yaşayış binasının altıncı mərtəbəsindən yıxılaraq avtomobilə çırpılıb, lakin o, xəsarət almadan xilas olub.

Sfera.az xarici KİV-ə istinadən xəbər verir ki, qadın evinin pəncərələrini təmizləyərkən müvazinətini itirərək yıxılıb.

Zərbənin təsirindən Hyundai markalı avtomobilin tavanı uçub, qabaq şüşəsi isə tamamilə sınıb. Hadisənin ən təəccüblü tərəfi qadının belə hündürlükdən yıxılmasına baxmayaraq, zərbədən dərhal sonra heç nə olmamış kimi özbaşına ayağa qalxması olub. Kadrlarda qadının maşından düşərək ətrafdakılardan kömək istədiyi və normal yeridiyi görünür. Təcili yardım gələnə və onu xəstəxanaya aparana qədər yaşlı qadın hadisə yerində olan insanlarla danışa bilib.

Zərərçəkmiş maşının sahibi yerli xəbər saytına deyib: "Pəncərədən baxanda maşınımın üstündə uzandığını gördüm. Dedilər ki, 6-cı mərtəbədə yaşayan qonşudur. 12 ildir bu binada yaşayıram, indiyə qədər də görməmişəm, bu qonşuları tanımıram".

Polisdən verilən açıqlamada deyilir: "İlkin araşdırmalarımız göstərir ki, yaşlı qadın öz ehtiyatsızlığı ucbatından pəncərədən yıxılıb. Qəzadan sonra xəstəxanaya çatdırılan qadına lazımi tibbi müdaxilələr edilir. Hadisə ilə bağlı araşdırmalar davam edir".

Firuzə Əliyeva

6-cı mərtəbədən yıxılan 80 yaşlı qadın heyrət doğurdu - FOTO