Tramp Harvarda yardımı dayandırdı
ABŞ Prezidenti Donald Tramp administrasiyası Harvard Universitetinə ayrılan 2,2 milyard dollarlıq federal maliyyəni dondurduğunu elan edib.
Sfera.az xarici mediaya istinadən xəbər verir ki, qərar Harvardın Ağ Evin antisemitizmlə mübarizəyə dair təqdim etdiyi tələbləri rədd etməsindən sonra verilib.
Təhsil Departamentinin yaydığı bəyanatda bildirilib: “Bu gün Harvardın verdiyi qərar ölkəmizin ən nüfuzlu universitetlərində yayılmış narahatedici hüquq zehniyyətini daha da gücləndirir”.
Qeyd edək ki, Ağ Ev ötən həftə universitet rəhbərliyinə antisemitizmlə mübarizə məqsədilə idarəetmədə dəyişikliklər, işə qəbul və tələbə qəbulu prosedurlarını əhatə edən geniş tələblər siyahısı göndərmişdi. Lakin Harvard bu siyahını rədd edərək, Ağ Evin universitetlərə nəzarət etməyə çalışdığını bəyan edib.
Universitetin prezidenti Alan Qarber bazar ertəsi Harvard ictimaiyyətinə müraciətində bildirib ki, təklif olunan nizamlanma qəbul edilməyəcək: “Biz nə universitetin müstəqilliyindən, nə də konstitusiya hüquqlarımızdan imtina edəcəyik”.
Qərarın ardınca Təhsil Departamenti Harvard Universitetinə ayrılan 2,2 milyard dollar dəyərində qrant və əlavə 60 milyon dollarlıq müqavilənin dərhal qüvvəyə minməklə dondurulduğunu açıqlayıb.
Bu hadisə, Tramp administrasiyasının siyasətinə qarşı açıq şəkildə dirəniş göstərən ilk böyük ABŞ universitetinin Harvard olduğunu göstərir.
Fidan Hacızadə
