Ağ Evin aparatının rəhbəri müavini Stiven Miller Çinlə bağlı çağırış edib. O, ABŞ-nin elektronika məhsullarına tətbiq etdiyi tarif siyasəti və 90 günlük tarif pauzası barədə danışarkən, Çin üçün deeskalasiya yolunu seçməyin ağıllı olacağını bildirib. Miller həmçinin Çinin qlobal ticarət sistemini təhrif etdiyini vurğulayıb.

ABŞ Çinin iqtisadi baxımdan zəiflədilməsi üçün nə edə bilər? Hansı imkanlara sahibdir?

Mövcud suallarla bağlı Sfera.az-a açıqlama verən politoloq Elçin Xalidbəyli ABŞ və Çin arasında baş verən ticarət savaşının olduqca təhlükəli və mürəkkəb bir proses olduğunu deyib.

Politoloqun fikrincə, bu situasiyada hər iki tərəfin həm güclü, həm də zəif cəhətləri mövcuddur:

“Bu səbəbdən də ticarət müharibəsində ABŞ-nin, yoxsa Çinin qalib gələcəyini öncədən dəqiq şəkildə müəyyənləşdirmək mümkün deyil. Hazırda müşahidə olunan əsas məqam odur ki, Çinə qarşı başlanan ticarət savaşı əksinə, ABŞ-nin öz əleyhinə çevrilməkdədir. Belə ki, Çin ABŞ ilə çətinləşən ticarət əlaqələrini tədricən dünyanın digər bölgələrinə, xüsusilə Avropa məkanına yönəltməyə başlayıb”.

E.Xalidbəyli digər tərəfdən, ABŞ üçün problem yaradan əsas amillərdən bəhs edərək qeyd edib ki, bu ölkə yalnız Çinlə deyil, eyni zamanda Avropa Birliyi ilə də ticarət gərginliyi yaşayır.

Onun sözlərinə görə, rüsumların tədricən artırılması Avropa İttifaqını Çinə daha çox yaxınlaşmağa və onunla ticarət əməkdaşlığını genişləndirməyə məcbur edir:

“Nəticədə həm Çin, həm də Avropa İttifaqı ABŞ ilə azalan ticarət əlaqələrini bir-birilə əməkdaşlığı artırmaqla kompensasiya etməyə çalışırlar. Bu isə ABŞ üçün əlverişli bir ssenari deyil. Əgər bu proses bu şəkildə davam edərsə, ABŞ tədricən öz tərəfdaşlarını itirə və rəqibləri öz ticari strategiyalarını ABŞ-dən yan keçməklə formalaşdıra bilərlər.

Belə görünür ki, hələlik ABŞ-nin Çinə qarşı başladığı ticarət savaşı Tramp administrasiyasının gözlədiyi nəticələri vermir. Mövcud vəziyyətdən ən çox narahat olan tərəf məhz ABŞ ola bilər”.

Fidan Hacızadə

ABŞ Çini gücdən salmağı seçdi - Növbəti qərar nə olacaq?