"Ukraynadakı münaqişə dünya müharibəsinə çevrilə bilər" - Zelenski
Ukrayna Prezidenti Volodimir Zelenski bildirib ki, əgər Kiyev və onun müttəfiqləri Rusiyanın irəliləyişinə qarşı qətiyyətli addımlar atmazsa, ölkəsindəki münaqişə dünya müharibəsinə çevrilə bilər.
Sfera.az "Anadolu" Agentliyinə istinadən xəbər verir ki, ABŞ-nin "CBS" kanalında yayımlanan “60 Minutes” proqramına müsahibəsində Zelenski vurğulayıb ki, artıq üç ildən çoxdur davam edən münaqişə təkcə Ukraynanın deyil, bütün dünyanın təhlükəsizliyini təhdid edir.
“Əgər biz möhkəm dayanmasaq, Putin daha da irəliləyəcək”,– deyən Ukrayna lideri, Rusiya Prezidentinin məqsədinin Rusiya imperiyasını bərpa etmək və NATO tərəfindən qorunan əraziləri geri almaq olduğunu iddia edib.
Zelenskinin sözlərinə görə, ABŞ NATO-nun üzvü kimi genişmiqyaslı qarşıdurmada iştirak etməyə məcbur qalacaq və bu ssenari üçüncü dünya müharibəsinə yol aça bilər.
Atəşkəs məsələsinə toxunan Zelenski bildirib ki, bunu yalnız Ukraynanın təhlükəsizliyinə beynəlxalq zəmanətlə təmin etmək olar: “Bizim üçün ədalətli sülh – suverenliyimizi və müstəqilliyimizi itirməməkdir”.
Ukrayna lideri ölkəsinin Rusiya nəzarətində olan ərazilərini heç vaxt Rusiyanın bir hissəsi kimi tanımayacağını və həmin torpaqları geri qaytarmaqda israrlı olduqlarını vurğulayıb.
Zelenski həmçinin ABŞ prezidenti Donald Trampa dəfələrlə xəbərdarlıq etdiyini deyib: “Putinə etibar etmək olmaz”.
Onun fikrincə, daha əvvəl əldə olunan atəşkəslərin pozulmasının əsas səbəbi Rusiyanın münaqişəni sona çatdırmaq istəməməsidir.
Amerika xalqının Ukraynaya edilən yardımdan nə qazandığına dair suala cavab olaraq, Zelenski bu mübarizənin ortaq bir dəyər uğrunda olduğunu deyib: “Bizə silah verən ölkələr əslində öz xalqlarını da qoruyurlar”.
Zelenski həmçinin Donald Trampı Ukraynaya səfərə dəvət edərək, onu vəziyyəti yerində görməyə çağırıb: “Bu bir teatr olmayacaq. İstədiyiniz hər şəhərə gedə bilərsiniz. Sadəcə gəlin və vəziyyəti öz gözlərinizlə görün”, – deyə o bildirib.
Bəsti Rəfizadə
