Rəsmi İran: "ABŞ ilə bağlı bu şənbə qərar verəcəyik"

İranın nüvə proqramına dair Tehran və Vaşinqton arasında dolayı danışıqlar sabah Ummanda keçiriləcək. 

Sfera.az bu barədə xarici mediaya istinadən xəbər verir. İran Xarici İşlər Nazirliyinin sözçüsü İsmayıl Bəkayi bu barədə verdiyi açıqlamada bildirib ki, İran danışıqlara yaxşı niyyət, tam diqqətlə yanaşır və diplomatiyaya real bir şans vermək niyyətindədir.

Bəkayi əlavə edib ki, ABŞ-nin düşmənçi ritorikasına baxmayaraq, bu qərarı düzgün qiymətləndirməsi vacibdir. O, eyni zamanda vurğulayıb ki, öncədən hər hansı bir hökm vermirlər:

“Şənbə günü qarşı tərəfin niyyətini və ciddiliyini qiymətləndirib, növbəti addımlarımızı buna uyğun müəyyənləşdirəcəyik”.

İranın ali dini lideri Ayətullah Əli Xameneinin siyasi müşaviri Əli Şəmxani isə qeyd edib ki, İranın Xarici İşlər Naziri ABŞ-lə dolayı danışıqlar üçün tam səlahiyyətlə Ummana gedir. Onun sözlərinə görə, Tehran media şousundan uzaq, real və ədalətli razılaşma əldə etmək istəyir: “Vacib və həyata keçirilə bilən təkliflər hazırlanıb. Vaşinqton əgər anlaşma üçün qətiyyət nümayiş etdirərsə, razılaşma yolunda heç bir maneə yoxdur”.

İranın rəsmi xəbər agentliyi məlumat verib ki, sabahkı danışıqlarda İran heyətinə Xarici İşlər Naziri Abbas Əraqçi, ABŞ nümayəndə heyətinə isə keçmiş prezident Donald Trampın xüsusi nümayəndəsi Stiv Vitkoff rəhbərlik edəcək. Görüşlərdə Umman Xarici İşlər Naziri Bədr bin Hamed əl-Busaidi vasitəçi qismində iştirak edəcək.

Fidan Hacızadə