"Böhranın astanasındayıq, bütün variantlara hazır olmalıyıq" - Tokayev
Dünyadakı cari hadisələr qlobal iqtisadi fırtınanın xəbərçisi ola bilər.
Sfera.az “Report”a istinadən xəbər verir ki, bunu Qazaxıstan Prezidenti Kasım-Jomart Tokayev paytaxt iqamətgahında qazaxıstanlı alimlər qarşısında çıxışı zamanı bildirib.
"Bir çox ekspertlər bəyan edirlər ki, dünya son onilliklərin ən ağır böhranlarından birinin astanasındadır. Tarif müharibələri nəticəsində istehsal və ticarət zəncirləri qırılır, bazarların zəifləməsi qeydə alınır, xammal qiymətlərində yüksək volatillik müşahidə olunur. Bu qaçılmaz olaraq bütün ölkələrə, o cümlədən Qazaxıstana təsir edəcək", - deyə K.Tokayev bildirib.
O, toplantı iştirakçılarını əmin edib ki, ölkə hakimiyyəti bu iqtisadi fırtınanın Qazaxıstan iqtisadiyyatına təsirlərinin aradan qaldırılması məsələlərinin həlli ilə məşğuldur: "Əminəm ki, panikaya səbəb yoxdur. Biz həmişə səylərimizi prioritet istiqamətlərə yönəldərək bütün çağırışların öhdəsindən inamla gəlmişik".
K.Tokayev, əlverişsiz xarici amillərə baxmayaraq, bütün prioritet infrastruktur layihələrinin və digər planlaşdırılmış işlərin tam həcmdə yerinə yetiriləcəyinə əminlik ifadə edib.
Qazaxıstan Prezidenti xatırladıb ki, aprelin 9-da ölkə hökumətinə və yerli icra orqanlarına inkişaf tempinin və investisiya axınının azalmasının qarşısını almaq məqsədilə fəaliyyət planı üzərində işi təcili şəkildə tamamlamağı tapşırıb.
"İndiki şəraitdə investisiyalar uğrunda mübarizə başlayacaq. Biz bütün variantlara hazır olmalı, praqmatik və inamla hərəkət etməliyik. Böhranlar ona görə yaxşıdır ki, idarəçilərin işgüzar keyfiyyətlərinin olub-olmadığını aydın şəkildə göstərir, həm də yeni imkanlar yaradır. Bu, radikal xarici şoklar şəraitində milli iqtisadiyyatın dayanıqlığını və sosial sabitliyi qorumaq üçün son dərəcə vacibdir", - o qeyd edib.
