"Fransa Fələstini dövlət kimi tanıyacaq" - Makron
Fransa Prezidenti Emmanuel Makron ölkəsinin Fələstini dövlət kimi tanıya biləcəyini açıqlayıb. O, bu qərarın iyun ayında keçiriləcək beynəlxalq konfransda qəbul olunmasının mümkün olduğunu bildirib.
Sfera.az "En Son Haber"ə istinadən xəbər verir ki, Yaxın Şərqdə baş verən son hadisələr Avropa ölkələrində diplomatik gündəliyi dəyişməyə başlayıb.
İsrail və Fələstin arasında uzun illərdir müzakirə olunan “iki dövlətli həll” modeli bu dəfə daha ciddi diplomatik müstəviyə daşınıb.
Makron Misirə etdiyi iki günlük rəsmi səfərdən sonra "France 5" kanalına verdiyi müsahibədə Fələstin məsələsinə toxunaraq, “Fələstini tanımağa doğru irəliləməliyik və qarşıdakı aylarda bu nəticəyə gələ bilərik”, – deyə bildirib. O, iyun ayında Səudiyyə Ərəbistanı ilə birgə sədrliyi edəcəkləri beynəlxalq konfransda bu məsələnin yekunlaşdırılmasını planlaşdırıldığını açıqlayıb.
Fransa Prezidenti daha əvvəl, 2024-cü ildə verdiyi açıqlamada, Fələstin dövlətini tanımağın Fransa üçün “tabu” (qadağa-red.) olmadığını qeyd etmişdi.a
Xatırladaq ki, İsrailin 7 oktyabr 2023-cü ildən etibarən Qəzzaya qarşı başladığı hücumlardan sonra Fransada müxalifət partiyaları Fələstinin dərhal dövlət kimi tanınması çağırışlarını artırmışdı.
Bəsti Rəfizadə
