“ABŞ sülh üçün çalışan prezidentə sahib olmalıdır” - İran XİN

İranın Xarici İşlər Nazirinin müavini Abbas Arakçı, ABŞ ilə aparılan dolaylı danışıqların strateji bir seçim olduğunu vurğulayıb. Arakçı, bu üsulun təcrübəyə dayandığını və diplomatiya üçün effektiv bir kanal yaratdığını bildirib. 

Sfera.az xarici mediaya istinadən xəbər verir ki, Arakçı iki ölkə arasındakı son görüşlərin “simvolik” olmadığını, əksinə, səmimi bir diplomatik təşəbbüs olduğunu qeyd edib.

O, İranın razılaşma əldə etməyə hazır olduğunu, lakin bunun üçün ABŞ-nin doğru addımlar atmasının vacib olduğunu bildirib. Arakçı İranın 2021-ci ildə Avropa İttifaqının vasitəçiliyi ilə ABŞ ilə dolaylı danışıqlar apardığını xatırladıb.

Arakçı “Bizə hörmət edilərsə, biz də qarşılıq verərik” deyərək, İranın diplomatiyanı üstün tutduğunu, lakin özünü müdafiə etməkdən çəkinməyəcəyini vurğulayıb. Nazir müavini hərbi texnikanın İran yaxınlığına yığılmasının mənfi siqnallar verdiyini və sülh danışıqlarını çətinləşdirdiyini də ifadə edib:

“Keçmişdə təhdidlərə boyun əymədik, gələcəkdə də əyməyəcəyik. Top artıq ABŞ-nin meydanındadır. ABŞ sülh üçün çalışan bir prezidentə sahib olmalıdır". 

Bəsti Rəfizadə