Rusiya Trampa məhəl qoymur: "Bu vəziyyət heç xoşuma gəlmir"

ABŞ Prezidenti Donald Trampın Ukraynaya qarşı artan hava hücumları ilə bağlı Rusiyaya etdiyi xəbərdarlığa Moskva cavab verib. Tramp Rusiyanın bombardmanlarını dayandırmasını tələb edərək, “Bu gedişat xoşuma gəlmir” deyib. Kreml isə münaqişənin sülh yolu ilə həllinin yalnız müəyyən şərtlərlə mümkün olduğunu bildirib.

Sfera.az “Hürriyet”ə istinadən xəbər verir ki, iki aydan artıqdır Ukrayna müharibəsini dayandırmaq üçün diplomatik səylər göstərən Tramp, Ağ Evdə jurnalistlərə açıqlamasında Rusiya və Ukrayna liderlərinin sülh istədiklərini bildirmələrinə baxmayaraq, hücumların davam etdiyini vurğulayıb:

“Bu vəziyyət heç xoşuma gəlmir. Rusiya tərəfi ilə danışırıq. Ümid edirəm ki, etdiklərinə son verərlər”.

Kreml sözçüsü Dmitri Peskov isə Trampın bu açıqlamasına cavab olaraq, Prezident Vladimir Putinin Ukraynada atəşkəsə dəstək verdiyini, lakin bunun üçün Rusiyanın cavabını gözlədiyi sualların olduğunu deyib:

“Ukrayna münaqişəsinin həlli Rusiyanın maraqları nəzərə alınmadan mümkün deyil”.

Qeyd edək ki, Moskva sülh danışıqlarına açıq olduğunu bildirir, lakin öz şərtləri çərçivəsində. Vaşinqton isə hücumların dərhal dayandırılmasını tələb edir. Münaqişənin hansı istiqamətdə inkişaf edəcəyi hələlik qeyri-müəyyəndir.

Bəsti Rəfizadə