İstanbulda filmlərə bənzəyən hadisə baş verib. Erol T. adlı vətəndaş mart ayında həyatını itirib və onun cansız bədəni Ədliyyə Tibb Qurumunda qardaşı tərəfindən müəyyən edilib.

Sfera.az bildirir ki, iyul ayında Erol T. ifadə verməyə gedəndə həqiqət üzə çıxıb.

Belə ki, hər şey 17 fevral 2024-cü ildə başlayıb. İstanbulun Kadıköy şəhərində polis qrupları yerdə uzanmış 60 yaşlı Erol T. ilə qarşılaşıb. Heyət maşınına mindirilən Erol T. polisə odekolon içdiyini dedikdən sonra vəziyyəti pisləşib və xəstəxanaya aparılaraq reanimasiyaya yerləşdirilib. Müalicəsi başa çatan Erol T.-nin mart ayında dünyasını dəyişdiyi qeyd edilib. Böyük qardaşı Ərdoğan T. qardaşının cansız cəsədini Ədliyyə Tibb Qurumunda müəyyən edib. Erol T. martın 30-da məmləkəti Aksarayda torpağa tapşırılıb. Erol T. xəstəxanaya aparılarkən, barəsində “spirt zəhərlənməsi” ilə bağlı istintaq başladılıb.

25 mart 2024-cü ildə vəfat etdiyi bildirilən Erol T.-nin iyulun 18-də polis bölməsinə gedərək ifadə verdiyi məlum olub. Onu alkoqolizmdən ölən evsiz adam kimi səhv salıblar.

Qardaşının cansız bədənini müəyyən edən Ərdoğan T., Erol T.-nin sağ olduğu aydınlaşdıqdan sonra ifadə verməyə çağırılıb. Cansız bədənin üzünün tanınmaz olduğunu deyən Ərdoğan T. “Qardaşım olduğuna əmin idim” deyib.

Hadisə araşdırıldıqdan sonra həqiqət üzə çıxıb. 25 mart 2024-cü ildə Kadıköydə spirtli içkidən zəhərlənərək ölən şəxsin Erol T. olduğu düşünülüb. Prokurorluq Erol T.-nin heç kimdən şikayət etmədiyi üçün "zəhərlənmə" işinə xitam verib.

Aynil

Martda öldü, dörd ay sonra dirildi: İstanbulda filmlərə bənzəyən hadisə