İran Trampın təklifini rədd etdi - Müharibə olacaq?

İranın xarici işlər naziri Abbas Əraqçi İranın ABŞ-lə nüvə sazişi üzrə birbaşa danışıqların aparılması imkanını rədd etdiyini və bunun mənasız olacağını vurğulayıb.

Əraqçinin sözləri ABŞ Prezidenti Donald Trampın İranın nüvə proqramı ilə bağlı birbaşa danışıqlara hazır olduğuna inamı fonunda səslənib.

Maraqlıdır, İranın birbaşa danışıqların yerinə hansı vasitələrlə öz məqsədlərinə çatması gözlənilir?

Bununla bağlı Sfera.az-a açıqlama verən politoloq Əlimusa İbrahimov İran rəhbərliyinin dəfələrlə ABŞ ilə birbaşa danışıqlara getməyin mənasız olduğunu bəyan etdiyini bildirib.

Onun sözlərinə görə, İranın Xarici İşlər Naziri Abbas Əraqçi də son bəyanatında eyni fikri ifadə edib:

“Lakin bu mövqenin İranın ABŞ ilə birbaşa danışıqlar aparmayacağı mənasına gəldiyini birmənalı şəkildə demək çətindir. İran müəyyən müddətdən sonra ABŞ ilə birbaşa danışıqlara başlaya bilər. Bu, daha çox ABŞ və xüsusilə də Donald Trampın yanaşmasından asılı olacaq. ABŞ İranla apardığı ritorikanı yumşaltsa, Tehran birbaşa danışıqlara başlamağa meyilli ola bilər. Buna görə də, İranın birbaşa danışıqlara getməyəcəyi ilə bağlı qabaqcadan verilən iddialar tam inandırıcı deyil. Sonda, İran danışıqlar prosesini pozan tərəf kimi göstərilməmək üçün istənilən formatda danışıqlarda iştirak etməyə razı olacaq. Hazırda səsləndirilən bəyanatlar isə gələcəkdə mövqeyin möhkəmləndirilməsi məqsədini daşıya bilər”.

Fidan Hacızadə