Zelenskinin doğulduğu şəhər raket hücumuna məruz qaldı: 18 ölü, 61 yaralı
Ukraynanın Dnipropetrovsk vilayətinin Kriviy Riq şəhəri Rusiya Silahlı Qüvvələrinin raket hücumuna məruz qalıb.
Sfera.az xarici mediaya istinadən xəbər verir ki, şəhər Ukrayna Prezidenti Volodimir Zelenskinin doğulub böyüdüyü yerdir. Hücum nəticəsində 9-u uşaq olmaqla 18 nəfər həlak olub, 61 nəfər isə yaralanıb.
Bu barədə Dnipropetrovsk Hərbi İdarəsinin rəhbəri Serhiy Lisak məlumat verib. Onun sözlərinə görə, hücum nəticəsində çoxsaylı yaşayış binaları zərər görüb. O, həmçinin qeyd edib ki, Rusiya ordusu gecə saatlarında şəhərə pilotsuz uçuş aparatı (PUA) ilə də hücum edib. Bu hücumda isə 1 nəfər ölüb, 7 nəfər yaralanıb.
Prezident Volodimir Zelenski də hadisə ilə bağlı açıqlama verərək, Rusiya ordusunun şəhəri ballistik raketlə hədəfə aldığını bildirib.
Digər tərəfdən, ABŞ Maliyyə Nazirliyinin nümayəndəsi Skott Bessent Zelenskini “şoumen” adlandıraraq sərt tənqid edib.
Fidan Hacızadə
