İngiltərəyə giriş qaydaları dəyişdi - Hökmən ETA əldə edilməlidir

İngiltərə hökuməti ölkəyə giriş qaydalarında yeni dəyişikliklər edib. Avropa İttifaqı da daxil olmaqla, dünyanın 48 ölkəsinin vətəndaşları artıq İngiltərəyə səfər etmək üçün Elektron Səyahət İcazəsi (ETA) almalı olacaqlar.

Sfera.az xəbər verir ki, yeni sistemə əsasən, vizaya ehtiyac duymayan sərnişinlər səyahətdən əvvəl rəqəmsal qeydiyyat proqramı vasitəsilə ETA əldə etməlidirlər.

Bu dəyişiklik Böyük Britaniyaya vizasız səfər edən bütün şəxslərə şamil ediləcək.

Sistem ilk dəfə 2024-cü ildə Körfəz Əməkdaşlıq Şurasına üzv ölkələrin vətəndaşları üçün tətbiq edilib. Daha sonra ABŞ, Kanada və Avstraliyadan İngiltərəyə səyahət edən altı milyon ziyarətçi də bu qaydaya tabe olub.

Proqram turizm, işgüzar səfərlər və altı aydan az müddətli digər qısamüddətli ziyarətlər üçün keçərlidir. Eyni zamanda, qısamüddətli təhsil və müəyyən ödənişli fəaliyyətlər üçün də ETA tələb olunur.

ETA-nın hansı ölkələrə tətbiq ediləcəyi ilə bağlı dəqiq siyahı Böyük Britaniya hökumətinin rəsmi veb saytında yer alır. 

Bəsti Rəfizadə