Trampın yeni hədəfi: Rusiya və Ukraynanı nə ilə "vuracaq"?
Rusiya-Ukrayna müharibəsinin uzanacağı təqdirdə Tramp administrasiyası həm Kiyevə, həm də Moskvaya təzyiq göstərmək üçün yeni planlar hazırlayır. Bildiyimiz kimi, Rusiyaya artıq bir çox sanksiya tətbiq olunub.
Maraqlıdır ki, bundan sonra hansı effektiv sanksiya tətbiq edilə bilər?
Mövzu ilə bağlı Sfera.az-a açıqlama verən politoloq Məhəmməd Əsədullazadə bildirib ki, Ukraynada atəşkəsin əldə edilməməsinin səbəbkarı Putindir:
“ABŞ Prezidenti Donald Trampın Rusiya və Ukrayna arasında 30 günlük atəşkəs təklifinə rəsmi Kiyev qeyd-şərtsiz razı olsa da, rəsmi Moskva bir sıra şərtlərlə çıxış etdi. Ukraynada atəşkəsin əldə edilməməsində birbaşa Rusiya prezidenti məsuliyyət daşıyır. Tramp da Putini manipulyasiya etdiyini deyib. Ümumiyyətlə, Rusiya-Ukrayna müharibəsi geopolitik qarşıdurmadır. Rusiya bu müharibədən istifadə edərək fövqəldövlət kimi tanınmasını tələb edir. Öz təsir zonasının ABŞ tərəfindən qəbul edilməsinə çalışır. Təbii ki, rəsmi Vaşinqton da buna getmir. Ona görə də tərəflər arasında danışıqlar demək olar ki, fiaskoya uğrayıb. Bu da gözlənilən idi”.
Politoloq vurğulayıb ki, ABŞ Rusiyaya təzyiq etmək üçün Ukraynaya hərbi yardımları intensivləşdirməlidir:
“Trampın həyata keçirdiyi siyasət birmənalı deyil. Putin ondan öz siyasi məqsədləri üçün istifadə edir. Tramp da artıq həqiqətləri görür, apardığı siyasətin dalana dirəndiyinin fərqindədir. Rusiyaya bir neçə sanksiya tətbiq olunub, yenilərinin də olacağı istisna deyil. Neft əməliyyatlarına da 500 faizlik rüsumun tətbiq ediləcəyi deyilir. ABŞ Ukraynaya geniş şəkildə yardımlar etsə, bu, Rusiyaya qarşı ən effektiv təzyiq hesab oluna bilər”.
Firuzə Əliyeva
