Çin hərbi təlimdə həqiqi partlayıcılardan istifadə etdi - Gərginlik artır
Çinin Tayvan ətrafında keçirdiyi hərbi təlimdə həqiqi mərmilərdən istifadə etməsi bölgədə gərginliyi artırıb. Şərqi Çin dənizində keçirilən təlimdə limanlara və enerji obyektlərinə qarşı dəqiq hücumlar həyata keçirilib.
Sfera.az "En Son Haber"ə istinadən xəbər verir ki, Çin Xalq Azadlıq Ordusunun Şərq Cəbhə Komandanlığı quru qoşunlarının “Strait Thunder-2025A” təlimi çərçivəsində uzun mənzilli real sursatlarla təlim keçirdiyini açıqlayıb.
Komandanlığın sözçüsü polkovnik Şi Yi təlimin nəzərdə tutulan nəticələrə çatdığını bildirib.
Tayvan Müdafiə Nazirliyi isə son 24 saat ərzində adanın ətrafında Çinə məxsus 76 döyüş təyyarəsi və 15 hərbi gəminin qeydə alındığını açıqlayıb.
Pekin rəhbərliyi Tayvanın Çinin ayrılmaz hissəsi olduğunu bildirir. Tayvan isə özünü müstəqil bir dövlət hesab edir.
Pekin “dinc yolla yenidən birləşmə” siyasəti çərçivəsində Tayvanı tam nəzarətə almaq niyyətindədir və bunun üçün güc tətbiq etməkdən çəkinməyəcəyini bəyan edib. Çin eyni zamanda, digər ölkələrin Tayvanla rəsmi əlaqə qurmasını “suverenlik pozuntusu” kimi qiymətləndirib.
Bəsti Rəfizadə
