"ABŞ Yaxın Şərqdə hərbi gücünü artıracaq" - Pentaqon
ABŞ Müdafiə Nazirliyi (Pentaqon) Yaxın Şərqdəki hərbi varlığını gücləndirəcəyini açıqlayıb. Müdafiə Naziri Pit Heqsetinin əmri ilə bölgəyə əlavə döyüş təyyarələri göndəriləcək və hava hücumundan müdafiə qabiliyyəti artırılacaq.
Sfera.az Türkiyə mediasına istinadən xəbər verir ki, Pentaqonun sözçüsü Şon Parnell Yaxın Şərqdə sabitliyi dəstəkləmək, təcavüzkar davranışları əngəlləmək və sərbəst ticarət axışını qorumaq məqsədilə hərəkətə keçdiklərini bildirib.
O, həmçinin Müdafiə Naziri Pit Heqsetinin "İran Yaxın Şərqdəki ABŞ maraqlarını təhdid etdiyi təqdirdə hərəkətə keçəcəklərini” vurğuladığını qeyd edib.
ABŞ Prezidenti Donald Tramp 7 martda İran lideri Ayətullah Əli Xamneyə həm təhdid, həm də danışıqlar təklif edən bir məktub yazmışdı. Lakin Xamney məktubun cavabında ABŞ-nin danışıqlarla problemləri həll etmək yox, öz tələblərini qəbul etdirmək istədiyini bildirib.
İran tərəfi Trampın təhdidlərini davam etdirdiyi müddətdə birbaşa danışıqların mümkün olmayacağını açıqlayıb və yalnız nüvə məsələsi üzrə dolayı yolla müzakirələrə hazır olduqlarını bildirib.
Tramp ABŞ ilə razılaşmanın əldə edilməyəcəyi təqdirdə İranı “heç vaxt görmədikləri şəkildə bombalayacaqları” ilə təhdid etmişdi. Xamney isə bu təhdidləri ciddi qəbul etmədiklərini, amma hər hansı bir hücuma güclü cavab verəcəklərini bəyan edib.
Bəsti Rəfizadə
