Rusiya Daxili İşlər Nazirliyinin fevralın 4-də yayımladığı məlumata əsasən, hazırda Federasiyada 670 min qeyri-qanuni miqrant yaşayır ki, onlardan əksəriyyəti qadın və uşaqlardır. Nazirliyin 2021-ci ilə olan məlumatına görə isə həmin vaxt bu ölkədə 120 min azərbaycanlı qeyri-qanuni miqrant yaşayırdı.

Rusiyanın Sverdlovsk vilayətinin məhkəmə icraçıları 2024-cü ildə 4200-dən çox qanunsuz miqrantı ölkəsinə geri göndərib ki, bu da 2023-cü illə müqayisədə 1872 nəfər çoxdur. Ölkədən çıxarılanların arasında 117 Azərbaycan vətəndaşı da yer alıb. Rusiya Prezidenti Vladimir Putinin 2024-cü il dekabrın 30-u imzaladığı fərmana əsasən, ölkədə yaşayan qeyri-qanuni miqrantlar 2025-ci il aprelin 30-na qədər ölkədən çıxarılmalıdır.

Maraqlıdır, Rusiyada qeyri-qanuni miqrantlara qarşı qanunlar niyə sərtləşdirilir?

Sfera.az xəbər verir ki, mövzu ilə bağlı açıqlamasında REAL partiyasının sədri Natiq Cəfərli bunun bir neçə səbəbi olduğunu qeyd edib.

Onun sözlərinə görə, səbəblər daxili “düşmən” obrazı yaratmaq, etnik diaspora təşkilatlarını zəiflətmək və miqrantları öz imperialist və işğalçı siyasətləri həyata keçirmək üçün ölməyə hazır olan əsgərlərə çevirməkdir:

“Avtoritar rejimlərdə iqtisadiyyatda, sosial həyatda hökumətin bacarıqsızlığını “izah” etmək üçün mütləq daxili və xarici “düşmənlər” lazımdır. Xarici düşmənlər artıq var – Ukrayna, Avropa, Yaponiya, Avstraliya və s. Daxildə bacarıqsız siyasəti isə miqratlara yükləmək ən rahat və asan yoldur. Həmçinin, Rusiyada siyasi-ictimai mobil qruplar yox dərəcəsindədir, ideologi siyasi partiyalar da yoxdur, əsas passionar kütlə etnik diasporalarda cəmləşib. Miqrantlara qarşı Kremlin “səlib yürüşünün” məqsədlərindən biri də etnik diaspora təşkilatlarını zəiflətmək, onları hüquq-mühafizə orqanlarına tam tabe etmək, ciddi nəzarət mexanizmləri yaratmaqdır.

SSRİ dağılanda Rusiyanın əhalisi 148 milyon 514 min nəfər idi, 2025-ci ilin yanvarın 1-nə olan məlumata görə əhali sayı 146 milyon 23 min nəfər olub. Yəni, 35 ildə əhali nəinki artmayıb, hətta 2 milyon 491 min nəfər azalıb. Son 35 ildə Rusiya vətəndaşlığını qəbul edənlərin sayı 17-18 mln. nəfərə yaxın olub. Yəni miqrantlar Rusiyaya gəlib yaşamasaydılar, vətəndaşlıq almasaydılar, bu gün Rusiya əhalisi 130 milyon nəfərə yaxın olardı, hətta, daha aşağı rəqəmlər görərdik, çünki vətəndaşlıq alan miqrantların da övladları artıq Rusiya ərazisində dünyaya gəliblər. Yəni yan təsirləri də nəzərə alsaq, miqrantlar olmasaydı, Rusiya əhalisi indi 125 milyon nəfərə ancaq çatardı”.

N.Cəfərli bildirib ki, Rusiyanın demoqrafiyasını heç miqrantlar da xilas edə bilmir:

“Son 6 ildə ölənlərin sayının doğulanlardan daha çox olduğu görünür. “Rosstatın” məlumatına görə, Rusiya Federasiyasında əhalinin təbii azalması (ölümlərin doğumdan çox olması) aşağıdakı kimi qiymətləndirilir: 2019-cu ildə – 317,2 min nəfər, 2020-ci ildə – 688,7 min nəfər, 2021-ci ildə – 1 milyon 042,7 min nəfər, 2022-ci ildə – 599,6 min nəfər, 2023-cü ildə – 495,3 min nəfər, 2024-cü ildə – 596,2 min nəfər.

Yəni Rusiya təbii olaraq “ölür”, əhali azalır, miqrantlar olmasa, hətta ac da qala bilərlər, çünki, miqrantların gördüyü işi rusiyalılar görmür, görmək istəmir. Bütün bunlara baxmayaraq, Kremlin təkidlə şovinist anti-miqrant siyasətinin izahı ancaq daxili problemləri ört-basdır etmək üçün “günah keçiləri” axtarışından başqa bir şey deyil, məntiqsiz yanaşmadır”.

Firuzə Əliyeva

Rusiyanın yeni miqrant siyasəti - Putin onları nə üçün uzaqlaşdırır?