ABŞ Prezidenti Donald Tramp bu gün bütün dünyaya qarşı yeni gömrük vergilərini elan edəcək.

Sfera.az Türkiyə mediasına istinadən xəbər verir ki, Vaşinqton, ABŞ-yə gömrük vergisi tətbiq edən bütün ölkələrə qarşılıqlı vergi tətbiq edəcəyini açıqlayıb. Prezident Trampın “Qurtuluş Günü” adlandırdığı bu gün, Ağ Evin Gül Bağçasında xüsusi tədbirlə qeyd olunacaq.

Trampın sözlərinə görə, yeni gömrük siyasəti ABŞ-ni xarici məhsullardan asılılıqdan xilas edəcək. O, ABŞ-nin son 50 ildə “soyulduğunu” iddia edərək, “Bizdən nə qədər rüsum alırlarsa, biz də onlardan o qədər alacağıq”, – deyə bildirib.

Ekspertlər yeni gömrük vergilərinin qlobal iqtisadiyyata ciddi təsir edəcəyini bildirirlər. Xüsusilə Avropa ölkələrinin bu qərardan böyük zərər görəcəyi gözlənilir. Avropa Komissiyasının Prezidenti Ursula von der Leyen Avropa İttifaqının güclü cavab verəcəyini bəyan edib.

Digər tərəfdən, Çin, Cənubi Koreya və Yaponiya aralarındakı sərbəst ticarət əlaqələrini gücləndirmək barədə razılığa gəliblər. Braziliya Prezidenti Lula da Silva isə Trampın ticarət siyasətinə qarşı may ayında Rusiya və Çin liderləri ilə görüşəcəyini açıqlayıb.

İqtisadçılar bu qərarın qlobal ticarətə mənfi təsir edəcəyini bildirirlər. İngiltərənin Aston Universitetinin hesabatına görə, gömrük rüsumlarının artırılması qiymət artımına, azalan rəqabətə və tədarük zəncirində pozuntulara səbəb ola bilər.

ABŞ-nin ticarət müşaviri Peter Navarro gömrük rüsumlarının ABŞ-yə ildə 600 milyard dollar gəlir gətirəcəyini iddia etsə də, bəzi ekspertlər bu rəqəmin qeyri-real olduğunu bildirirlər.

Tramp administrasiyasının qərarlarının dünya iqtisadiyyatına necə təsir edəcəyi yaxın günlərdə daha aydın olacaq.

Bəsti Rəfizadə

Tramp yeni gömrük vergilərini açıqlayacaq - “Qurtuluş Günü” olacaq