Rusiyada hipersəs raketləri ilə təchiz edilmiş “Perm” nüvə sualtı qayığı suya buraxıldı. Prezident Vladimir Putin mərasimdə çıxış edib.

Sfera.az “NTV”yə istinadən xəbər verir ki, Rusiya Prezidenti Vladimir Putin Murmansk limanında Atomflotu ziyarət edib. O, dünən axşam saatlarında baş tutan bu ziyarət zamanı videokonfrans vasitəsilə Severodvinsk şəhərində dördüncü nəsil çoxməqsədli nüvə sualtı qayığı olan “Perm”in suya buraxılması mərasiminə qatılıb.

Mərasimdə çıxış edən Putin sualtı qayığın istehsalında iştirak edən komandalara təşəkkür edib:

“Bu gün ‘Perm’ nüvə enerjili çoxməqsədli sualtı qayığı əfsanəvi Sevmash gəmiqayırma zavodunda suya buraxılır. Biz müasir raket sualtı qayıqlarının seriyalı istehsalına davam edirik. Gələn il onun döyüş xidmətinə qoşulması gözlənilir”.

Putin bildirib ki, “Yasen-M” tipli raket sualtı qayıqları son texnologiya ilə təchiz edilmiş naviqasiya və rabitə sistemlərinə, eləcə də müasir sonar avadanlıqlarına malikdir. O əlavə edib:

“Bunlar yüksək dəqiqlikli silahlar və robot sistemləri daşıyır. ‘Perm’, ‘Zircon’ hipersəs qanadlı raketləri daşıyan ilk çoxməqsədli sualtı qayığa çevrildi”.

Rusiya lideri ölkənin donanmasını gücləndirməyə davam edəcəklərini, müasir silahlar, qabaqcıl texnologiyalar və rabitə sistemləri ilə təchiz olunan döyüş gəmiləri və sualtı qayıqların istehsal tempinin və miqyasının artırıldığını vurğulayıb.

Putin sözlərinə əlavə edib:

“Bu sualtı qayıqlar və döyüş gəmiləri donanmamızın gücünü artıracaq, Rusiyanın dəniz sərhədlərinin təhlükəsizliyini möhkəmləndirəcək və Şimal Dənizi marşrutunu qoruyacaq. Onlar artan qlobal rəqabət fonunda Arktika bölgəsi də daxil olmaqla, Rusiyanın milli maraqlarını qorumağa kömək edəcək. Biz Rusiyanın ərazi bütövlüyünü və suverenliyini müdafiə etmək və onu aparıcı dəniz dövləti kimi inkişaf etdirmək üçün əlimizdən gələni etməyə davam edəcəyik”.

Bəsti Rəfizadə

Putin qərar verdi: Hipersəs nüvə sualtı qayığı suya buraxıldı