İslamofobiya rəmzi: Hegsethin qolundakı “kafir” döyməsi
ABŞ-nin Müdafiə naziri Pit Hegseth, dünən sosial mediada paylaşdığı görüntülərdə ABŞ əsgərləri ilə birlikdə idman edərkən çəkilmiş fotolarını yayımlayıb.
Sfera.az “Hürriyet”ə istinadən xəbər verir ki, fotolarda Hegsethin qoluna yeni döymə etdirdiyi aydın görünür. Onun sağ pazusunun alt hissəsində ərəb dilində “kafir” yazılmış döymə olduğu diqqət çəkib.
Vəzifəyə başlamazdan əvvəl də bədənindəki döymələrlə diqqət çəkən Hegsethin əvvəlki fotolarında bu yazının olmadığı üçün onun bu döyməni nazirliyi dövründə etdirdiyi ehtimal edilir.
Mütəxəssislər bildirir ki, “kafir” yazılı döymələr xüsusilə Qərbdə İslam əleyhdarı ifrat sağçı qruplar tərəfindən istifadə edilir.
Hegsethin bədənində Xaçlılara aid “Qüds Xaçı”, Haçlı yürüşlərinin şüarlarından olan və “Tanrı belə buyurdu” mənasını verən latınca “Deus Vult” ifadəsi, İraqda xidmət edərkən istifadə etdiyi AR-15 tüfəyi və ABŞ bayrağı kimi xristian milliyyətçiliyinə aid simvolların döymələri də mövcuddur.
Bəsti Rəfizadə
