Məxfiliyi ləğv edilən CIA sənədlərində On Əmrin yazıldığı Əhd Sandığının 1988-ci ildə tapıldığı iddia edilir.

Sfera.az “NTV”yə istinadən xəbər verir ki, Tövrata görə, Hz. Musa On Əmri qızıl örtüklü müqəddəs sandığın içinə yerləşdirib və sandıq uzun illər Yerusəlimdəki Süleyman Məbədində saxlanılıb. Lakin e.ə. 586-cı ildə Babil ordularının şəhəri işğalı zamanı sandıq itkin düşüb.

Bu barədə müxtəlif nəzəriyyələr mövcuddur. Bəzi iddialara görə, Əhd Sandığı Efiopiyaya aparılıb və Aksum şəhərindəki Məryəm Ana Kilsəsində saxlanılır. Lakin bu iddianı təsdiqləyən qəti sübut yoxdur.

Məxviliyi ləğv edilən CIA sənədlərində Əhd Sandığının yerinin müəyyən edilməsi üçün xüsusi paranormal qabiliyyətlərə malik şəxslərdən istifadə edildiyi bildirilir.

“Project Sun Streak” adlı proqram çərçivəsində həyata keçirilən bu təcrübədə “Uzaqgörən №032” adlı bir şəxsin sandığın Yaxın Şərqdə, yeraltında, qaranlıq və rütubətli bir məkanda saxlandığını dediyi qeyd olunub. O, həmçinin sandığın ağac, qızıl və gümüşdən hazırlandığını və üzərində altı qanadlı mələk fiquru olduğunu iddia edib.

Sənədlərdə paranormal istedadı olan şəxsin sandığın qorunduğunu və yalnız “səlahiyyətli şəxslər” tərəfindən açılmasının mümkün olduğunu söylədiyi də bildirilir. Məlumata görə, sandığın zorla açılmasına cəhd edilsə, “naməlum bir güc” tərəfindən hücum edilə biləcəyi ehtimal olunur.

Digər tərəfdən, Əhd Sandığının Efiopiyada olduğu barədə uzun illərdir mübahisələr davam edir.

Əfsanəyə görə, Səba Kraliçası ilə Kral Süleymanın oğlu Menelik sandığı Yerusəlimdən Efiopiyaya aparıb və Aksumdakı kilsəyə yerləşdirib. Lakin XX əsrdə sandığı gördüyünü iddia edən bəzi mütəxəssislər, onun sadəcə bir surət olduğunu bildiriblər.

Əhd Sandığının harada olduğu hələ də bilinməsə də, yeni ortaya çıxan CIA sənədləri ABŞ kəşfiyyatının bu məsələyə illərdir maraq göstərdiyini və paranormal qabiliyyətlərə malik şəxslərlə araşdırmalar apardığını sübut edir.

Bəsti Rəfizadə

Gizli CIA sənədləri: Əhd Sandığı tapılıb?