Rusiya Daxili İşlər Nazirliyinin statistikasına görə, Rusiya vətəndaşlığı almaq istəyənlərin və ölkədə yaşamaq üçün icazə alanların sayı əhəmiyyətli dərəcədə azalıb.

Sfera.az “NTV” yə istinadən xəbər verir ki, 2024-cü ildə cəmi 209 min nəfər Rusiya pasportu alıb. Bu rəqəm son beş ilin ən aşağı göstəricisi hesab olunur.

Eyni zamanda, Rusiyadan deportasiya edilən xarici vətəndaşların sayı rekord həddə çatıb. Daxili İşlər Nazirliyi bu tendensiyanı miqrasiya sahəsində nəzarətin gücləndirilməsi ilə əlaqələndirir.

Rusiyalı ekspertlər hesab edirlər ki, bu göstəricilərə Crocus Hall-da baş verən terror aktı və xarici vətəndaşların ölkələrinə qaytarılması ilə bağlı yetərli tədbirlərin görülməməsi də təsir edib.

Rusiya Daxili İşlər Nazirliyinin 2024-cü ilin yanvar-dekabr ayları üzrə açıqladığı miqrasiya hesabatına əsasən, bu dövrdə 209 min nəfərə Rusiya vətəndaşlığı verilib. Bu, 2023-cü illə müqayisədə 44,8% azalma deməkdir.

Nazirlik həmçinin xarici vətəndaşlara Rusiya ərazisində yaşamaq üçün verilən icazələrin də kəskin azaldığını açıqlayıb. 2024-cü ildə 44,5 min nəfərə müvəqqəti yaşamaq icazəsi verilib ki, bu da 2023-cü illə müqayisədə iki dəfə azdır. 214,9 min nəfərə daimi yaşamaq icazəsi təqdim edilib və bu göstərici də 21,3% azalma qeydə alınıb.

Nazirlik “yeni rusların” sayının azalmasını 2022-2023-cü illərdə yeni bölgələrdə yaşayanların sadələşdirilmiş qaydada pasport alması ilə izah edir. Bununla yanaşı, bu tendensiya miqrasiya nəzarətinin sərtləşdirilməsi ilə də bağlıdır.

2024-cü ildə 190,2 min nəfər Rusiyadan deportasiya edilib ki, bu da 2023-cü illə müqayisədə 31,1% çoxdur. Onların 157 mini Rusiyanın qanunlarını pozduğuna görə ölkəni tərk etmək məcburiyyətində qalıb.

Bundan əlavə, 1757 nəfər Rusiya vətəndaşlığından çıxarılıb. Daxili İşlər Nazirliyi, “Daxili işlər orqanları, Rusiyanın qanunvericiliyinə əməl etməyən xarici vətəndaşların ölkəyə girişini məhdudlaşdırmaq üçün işləri gücləndirib” açıqlamasını verib.

Rusiya polisi ölkəyə girişin qadağan edilməsi ilə bağlı 267,2 min müraciət göndərib. Bu, 2023-cü illə müqayisədə 93,8 min daha çoxdur.

Dövlət Dumasının MDB İşləri Komitəsi sədrinin birinci müavini Konstantin Zatulinin fikrincə, Rusiya vətəndaşlığına keçmək istəyənlərin sayının azalmasının başqa səbəbləri də var. Kommersant qəzetinə açıqlamasında Zatulin bildirib: “Davam edən müharibə şəraitində, Rusiyaya qarşı tətbiq edilən sanksiyalar fonunda və xüsusilə də Qərbdə ‘rus’ sözünün neqativ mənada qəbul edildiyi bir dövrdə vətəndaşlığa marağın azalması təəccüblü deyil”.

Bəsti Rəfizadə

Rusiyaya maraq azalır: Vətəndaşlıq almaq istəyənlərin sayı kəskin düşüb