İsrail Qəzzada hərbi əməliyyatları davam etdirəcək - Müdafiə naziri

İsrailin müdafiə naziri İsrael Katz Qəzza zolağında hərbi əməliyyatların davam etdirilməsi üzrə yeni planları təsdiqləyib.

Sfera.az Teleqraf-a istinadən xəbər verir ki, bu barədə "The Times of Israel" məlumat yayıb.

Onun sözlərinə görə, İsrail ordusunun Cənub Komandanlığının rəhbəri general-mayor Yaniv Asor və digər hərbi rəhbərlərlə keçirilən görüşdən sonra əməliyyat planları qəbul edilib.

Katz vurğulayıb ki, əsas məqsəd HƏMAS tərəfindən girov saxlanılan israilliləri azad etməkdir:

"Əgər HƏMAS girovları qaytarmaqdan imtina etsə, bunun daha ağır əvəzini ödəyəcək - torpaqlarını itirəcək, döyüşçüləri və infrastrukturu tamamilə məhv ediləcək".

Xatırladaq ki, martın 18-də İsrail ordusu Qəzzada hərbi əməliyyatları bərpa edərək anklava kütləvi hava zərbələri endirib. Baş nazir Benyamin Netanyahunun ofisi bunu HƏMAS-ın danışıqlar zamanı irəli sürülən təkliflərdən imtina etməsi ilə əlaqələndirib. HƏMAS isə hərbi əməliyyatların yenidən başlamasında İsrail və ABŞ-ni ittiham edib.