1a:T656,

Alman gömrük orqanları 14 mart tarixində Rügen adası sahillərində dayanan Panama bayraqlı “Eventin” adlı neft tankerini həbs edib.

Sfera.az Almaniyanın “Spiegel” jurnalına istinadən xəbər verir ki, gömrük idarəsinin bu qərarı ilə birlikdə tanker və onun daşıdığı təxminən 100 min ton, 40 milyon avro dəyərində olan xam neft Almaniya dövlətinin mülkiyyətinə keçib.

Təhlükəsizlik mənbələrinin bildirdiyinə görə, bu qərardan sonra gəminin bayrağı dəyişdiriləcək. Alman hökuməti, mövcud sanksiyalara baxmayaraq, Rusiyanın dünyaya neft satmaq üçün istifadə etdiyi “kölgə donanması”na qarşı sərt mövqe nümayiş etdirmək qərarına gəlib. Beləliklə, Berlin rəhbərliyi Moskvaya açıq mesaj göndərib: Almaniya Rus neftinin Baltik dənizi üzərindən daşınmasına göz yummayacaq.

Xəbərdə həmçinin qeyd olunur ki, aidiyyəti orqanlar neftin təhlükəsiz şəkildə necə və harada boşaldılacağını planlaşdırırlar. Tankerdə sızma riski olduğuna görə, gəmi Sassnitz şəhəri sahillərinə çəkilib və hazırda Alman təhlükəsizlik qüvvələri tərəfindən 24 saat müşahidə altındadır.

Bildirilib ki, “Eventin” gəmisi fevral ayının sonundan etibarən Avropa İttifaqının Rusiyanın “kölgə donanması” siyahısına daxil edilib.

Fidan Hacıyeva
sfera.az

Almaniya Rusiyaya məxsus neft tankerini saxlayıb