Husilərdən sonra növbə İranındır? - Zərbələrin endirilməsi ehtimalı artır

ABŞ Prezidenti Donald Tramp Yəmənin husi qiyamçılarının hücumlarının arxasında İranın olduğunu bildirib. Tramp husilərin bütün hücumlarına görə Tehranı məsul biləcəyini deyib və İranı vuracağı ilə hədələyib.
ABŞ bu hədələrini gerçəkləşdirərsə, hansı nəticələr gözlənilir? Bu cür bəyanatlar regionda yeni müharibə və ya gərginliklərə yol aça bilərmi?
Sfera.az-a bu barədə açıqlama verən politoloq Əziz Əlibəyli hazırda Yaxın Şərqdə, xüsusilə də İsrail-Livan sərhədində qarşıdurmaların davam etdiyini bildirib.
Politoloq vurğulayıb ki, husilərin İran tərəfindən dəstəklənməsi bu ölkəni də hədəfə çevirir:
“Husilərin arxasında İranın təsirində olan silahlı qruplaşmaların durduğu ehtimal edilir. Güman edilir ki, bu qruplaşmalar İran tərəfindən maliyyələşdirilir və dəstəklənir. Buna görə də həmin birləşmələrə qarşı hərbi zərbələr endirildikdən sonra, İranın özünün də hədəfə çevrilməsi gözlənilir. Eyni zamanda, İranın ali rəhbəri Xamenei və ABŞ-nin Prezidenti Donald Tramp arasında baş verən məktub mübadiləsi və onun nəticələri fonunda İranın xüsusi təyinatlı hərbi qüvvələrinin hədəfə alınması gündəmdədir. Yəməndə aparılan hərbi əməliyyatlardan sonra İranın strateji obyektlərinə də zərbələrin endirilməsi ehtimalı artır”.
Fidan Hacızadə