Böyük Britaniyanın Baş naziri Kir Starmerin rəsmi nümayəndəsi bildirib ki, çoxlu sayda ölkə Ukraynada sülhməramlı qüvvə yerləşdirməyə hazırdır. Onun verdiyi məlumata əsasən, bu təşəbbüs, ABŞ Prezidenti Donald Trampın Rusiya ilə sülh danışıqlarını təşviq etməsindən sonra Britaniya və Fransa tərəfindən irəli sürülüb və 37-dən çox ölkənin Ukraynanı dəstəkləmək üçün koalisiyaya qoşulması gözlənilir. Həmin ölkələrin əksəriyyəti NATO-ya üzvdür.

Rusiya NATO-ya üzv ölkələrin əsgərlərinin Ukraynada yerləşdirilməsinə qarşı çıxıb.

Bəs Ukrayna üçün sülhməramlı qüvvələrin göndərilməsi sabitlik və təhlükəsizlik baxımından nə dərəcədə önəmli hesab oluna bilər?

Mövcud suallarla bağlı Sfera.az-a açıqlama verən politoloq Tural İsmayılov Avropa İttifaqı, Britaniya və ABŞ arasında Ukrayna məsələsində konseptual fikir ayrılıqları olduğunu bildirib.

Onun sözlərinə görə, hazırda ABŞ Ukraynada döyüş əməliyyatlarının dərhal dayandırılması üçün bütün səylərini ortaya qoyduğu halda, Britaniya və Avropa İttifaqı vəziyyətin daha da davam etməsinə çalışır:

“Bu, təbii olaraq, Ukrayna böhranının həllini daha da çətinləşdirir. Mövcud şəraitdə Ukraynaya sülhməramlı qüvvələrin göndərilməsinə Rusiya qətiyyən razı ola bilməz. Avropa sülhməramlılarının Ukrayna ərazilərində yerləşdirilməsi fonunda Rusiyanın bu ölkə ilə hər hansı bir sülh müqaviləsi imzalaması və ya çərçivə sazişi bağlaması da inandırıcı görünmür”.

Politoloq hazırda Ukrayna rəhbərliyinin əsas məqsədinin Qərbin Ukrayna ərazilərində mövcudluğunu daha da gücləndirməkdən ibarət olduğunu vurğulayıb.
T. İsmayılov qeyd edib ki, buna görə də Zelenskinin hökuməti həm Trampdan təhlükəsizlik zəmanəti almaq istəyir, həm də Avropanın təklif etdiyi sülhməramlı qüvvələrin yerləşdirilməsi məsələsinə müsbət yanaşır:

“Lakin Rusiya həm siyasi, həm də hərbi rəhbərlik səviyyəsində dəfələrlə bəyan edib ki, Qərb institutlarının hansısa ad altında Ukrayna ərazisində yerləşdirilməsinə göz yummayacaq. Rusiyanın Ukrayna ərazilərinə hücumu da NATO-nun şərqə doğru genişlənməsi adı altında başladı. Belə bir şəraitdə Rusiya, sərhədlərinə yaxın ərazilərdə sülhməramlı qüvvələrin yerləşdirilməsinə razılıq verməyəcək”.

Fidan Hacızadə

Ukraynada sülhə mane olacaq səbəb: "Bu, böhranının həllini çətinləşdirir"