Perulu balıqçı Maksimo Napa 95 gün Sakit Okeanın açıq sularında qalıb. O sağ qalmaq üçün böcəkləri, quşları və dəniz tısbağalarını yemək, həmçinin yağış sularını toplamaq məcburiyyətində qalıb.

Sfera.az bildirir ki, balıqçı Maksimo Napa dekabrın 7-də yoxa çıxıb və onun taleyi martın 12-dək naməlum qalıb. Kişi Ekvador sahillərində evindən təxminən 1100 km aralıda, ağır susuz və kritik vəziyyətdə tapılıb.

Napa öz qayığı ilə 2024-cü il dekabrın 7-də Perunun Markona şəhərindən yola düşüb və iki həftəlik balıq ovu ekspedisiyası keçirməyi planlaşdırıb. O, özü üçün ehtiyat toplayıb açıq okeana çıxıb, lakin onuncu gün qayığı fırtınaya düşüb. Kişi vaxtında geri qayıtmayanda ailəsi axtarışa başlayıb, lakin bütün cəhdlər boşa çıxıb.

Martın 12-də balıqçı patrulu onun məmləkətindən 1100 km aralıda Napanın qayığına rast gəldi. Kişinin ağır susuzlaşdırma əlamətləri və kritik vəziyyətdə olduğu aşkarlanıb və daha sonra xəstəxanaya aparılıb.

"Ölmək istəmirdim. Böcəkləri, quşları, ekstremal hallarda isə tısbağaları yedim" - deyən balıqçı xilas edilənə qədər son 15 günü qidasız keçirsə də yağış sularını topladığını və sağ qalmağa çalışdığını bildirib.

Kişi əlavə edir ki, ailəsi - iki aylıq nəvəsi və yaşlı anası haqqında düşünməyə çalışıb və Allahdan ona sağ qalmaq şansı verməsini istəyib.

"Hər gün anamı düşünürdüm. Allaha şükür edirəm ki, mənə ikinci şans verdi" - deyə Napa bildirib.

Balıqçının anası Yelena Kastro da mediaya açıqlaçasımda bildirib ki, ailədə hamı Maksimonun evə qayıdacağına ümid edib. Lakin zaman keçdikcə onların bəziləri ümidlərini itirməyə başlayıblar.

Napa hazırda Ekvadorun Paita şəhərindədir və o, əlavə tibbi müayinədən keçməlidir. Kişinin vəziyyəti yaxşılaşdıqdan sonra evə qayıda biləcək.

Aynil

Balıq tutmağa gedərkən itdi: Açıq okeanda 95 gün sağ qalıb